立場新聞 Stand News

劉康這個年輕人

2019/7/29 — 16:05

劉康

劉康

劉康讓我寫代序。

初見劉康,印象不太好,喺朋友屋企等咗又等,最後電話噏,唔上嚟,改去街口見,覺得唔濌伯,全無時間觀念。嗰陣五月初,前後腳,我嚟台北佢就到。其時「送中條例」,林奠話之你死,有恃無恐,挌硬嚟,三月反「送中」,只得萬三人,反抗微弱,令人失望。其後再遊行,不過倒轉,變成三萬幾。眼看前景不妙,我惟有着草先。

以為劉康亦擔心,因為口袋罪,舉過「香港獨立」,仲喺林奠頭頂,如果惡法通過,走唔甩。除此以外,我唔知佢點解嚟,斷估唔係有閒情,出嚟玩啩?

廣告

路邊攤一坐低,朋友問去咗邊:逛夜市,所以遲到。真喺吹賬!!! 我有些心急,問佢點打算,喺咪想留响台灣?原來唔係,的確嚟玩,睇住菜單。同朋友眼望望。其後我又問,返香港,唔擔心?無乜反應,點完菜,就講其它。

大概怕殊途同歸,見「香港民族黨」被禁,佢話政黨要改名。我問改乜嘢,唔講。後來見網絡消息,變成「香港效益主義」。睇過報導,知道啲,源自英國哲學家邊泌。所謂「效益」或「功利」,如同楊朱「拔一毛以利天下而不為」,尋求個人幸福,亦為天下人。

廣告

無想過會搵我,寫兩句。平時都留意佢,唔知點樣,我擔心喺香港,遲早出事;更加冇想到,年紀輕輕,會出書。

實話實說,我這種買書佬,腌腥悶,唔係好書唔推薦。劉康呢本嘢,寫得好咩?好難講,因為睇書講年紀,唔同年歲唔同感受。一如漫畫,細路覺得好好笑,大人無感覺,就係呢個道理。劉康嘅年紀,正是慘綠少年,唔大唔細,有時好幼稚,但呢個唔使理,重要係佢為人,有乜價值觀。

佢啲文章網絡上,多數睇過哂,算唔錯 — 我指跟同齡人比,成熟好多。特別係社會議題,試問香港有幾個學生哥,痞過壁屋、受過折磨。其中一篇,越睇越難過,尤其個罪名,絕對荒謬,有乜理由,玩具當真槍?從佢嘅遭遇,可見香港法庭,經已不公。

大抵經歷,加上睇書,唔同鍵盤戰士,紙上談兵。佢係身體力行,用書本知識,應對現實,唔逃避、唔埋怨,勇敢直視,呢啲價值觀,就係優點。我諗年輕人上街、遊行,對抗強權,面對橡膠子彈,仍然冇放棄,就係呢種精神。

 

林榮基ㅤ台北 2019/7/29

發表意見