立場新聞 Stand News

劉江華紮職記

2015/7/22 — 18:50

呢期最爆嘅新聞,除左鉛水事件之外,就肯肯定係劉江華紮職喇。曾德成同鄧國威分別「被辭任」民政事務局局長及公務員事務局局長,而接任曾德成嘅,竟然係2012年立法會選舉落敗、其後鹹魚翻生獲政府委任做政制及內地事務局副局長嘅劉江華!見到劉局長由小小嘅區議員,一步一步咁行到今日局長之路,真係令人覺得好勵志,人生真係充滿希望!亦不禁令小編讚嘆,區議會真係一個人傑地靈嘅地方,事關原來唔少政府官員都做過區議員㗎。

首先介紹返劉局長先。佢先後做過沙田曾大屋、秦金及田心區區議員,亦自1998年起展開立法會議員生涯。不過劉局長嘅仕途並唔係咁順風順水,2003年區議會選舉落敗,直至2011年先重返沙田區議會;2012年更加因為建制配票失誤令佢連任失敗。不過唔知呢啲就係叫「塞翁失馬,焉知非福」,劉局長雖然失掉議席,但竟然得到689嘅識賞識,一躍成為政制及內地事務局副局長;三年後嘅今日佢嘅事業更加係再創高峰,做埋民政事務局局長添!所以話,世事真係無絕對㗎。 

廣告

除咗劉局長之外,其實都有其他建制陣營嘅區議員拍拍屁股就走入熱廚房,例如新民黨嘅陳岳鵬,佢喺2010年辭去南區區議員,走去做政制及內地事務局政治助理;至於觀塘區區議員、民建聯嘅陳百里於2013年獲委任商務及經濟發展局局長政治助理而辭任。仲有最經典嘅莫過於「白宮發言人」馮煒光,2013年獲委任為新聞統籌專員而辭去南區區議員一職。雖然馮煒光來自民主黨,但佢未離黨之前嘅行為,都已經相當建制,話佢係建制派人士,小編相信無人會反對。

劉江華紮職一事究竟有咩啟示呢?唔少分析話,由於劉有多年選舉經驗,地區人脈廣,佢做民政事務局局長,有利政府編配地區資源,令建制派於年尾區議會選舉及出年立法會選舉中得益,小編都無需多費唇舌;反而小編留意到一個細微細眼位,就係區議會議席長期畀建制派壟斷,但係佢哋每每唔該都無聲,就走咗去升官發財(已經唔計其他涉嫌犯法而被免去職務嘅)。可能有人會話,咁唔通成世做區議員咩,人望高處,地位越高,先可以做到更多利民嘅施政嘛!呢層就當然啦,不過暫時利民嘅事就未見到,但升官佢哋行先。呢班人係咪真係有心走入市民之中、服務地區,大家心裏有數!

廣告

 

原刊於 2015選戰 顛覆區議會! 

發表意見