立場新聞 Stand News

勿忘初衷,即使直到 2047

2019/6/15 — 18:36

【文:亂世】

我係一個八十後,25 歲前,政治、政府、回歸,我覺得所有嘢都唔關我事,我只係想係我年輕時盡情玩樂,政治,自然有適當嘅人去擔心。

廿五歲後,開始為自己既未來擔心,人大咗,明白原來政治好深,諗著唔關自己事,但係發覺原來呼吸每一口空氣都可以同政治拉上關係,此料不及,結婚,第一個小孩出生,正是雨傘運動時期,當年,我也在金鐘睡了好幾個晚上,見証香港人的和諧和理性,感受到三十年來從未感受到嘅公德心、同理心,有比自己細嘅學生問自己要唔要水,食物和保暖物品,我的心溫暖,也更慚愧,當小孩一個月大的時候,我連同太太帶女兒一同前往,希望可以出一分力。

廣告

雨傘運動清場,對政府、市民無爭取到什麼實質改變,但我相信贏咗嘅係好多人想改變嘅心以及對大陸嘅危機感,總算係有得著。往後嘅魚蛋革命,多次的社會運動,我無參與,上一次的失敗令我心灰,而且有了第二個小孩,生活迫人四個字,是借口,也是現實。

直到今年,引渡修例,政府想再一次推我們香港人去火坑,若果通過後會對我們的下一代影響深遠,香港亦再無核心價值可言,回歸後的最大倒退。6.9 大遊行,我再次參與,今次太太也跟我一起,下午二時走到晚上十一時,超過一百萬人,和平而有秩序,換來政府回應只是繼續二讀,如何可以不氣憤。午夜衝擊立法會,跟本就係因為政府嗰一份無人性嘅回應。

廣告

6.12,佔領金鐘再次發生,每一個人也是自發走出來,比起雨傘運動有更多年紀小的學生,我在場幫手運送物資,行經之處人群會自動讓開一條路,在你旁邊拍手掌,高呼「香港人加油」,雖然做嘅嘢好微不足道,都可以獲得咁多掌聲,好感動。有一個大概十三,四歲的小孩,我們對望幾秒,沒有談話,佢嘅眼神同我個女睇英雄電影時係一樣嘅,眼神很淺,感受卻很深。警方開始清場,無論你喺天橋上、商場內、地鐵站,整個金鐘都係催淚彈嘅氣味,想嚇走我哋,但只會令我們更團結,到晚上 9 時左右,我心有不甘,我好想同學生共同進退,無奈我還有父親的角色,回家盡量灌輸正確觀念給我的下一代,也想對現場的各位講一聲對不起,多謝。

呢一個時代,當權者無視市民,警察變成當權者打壓異己嘅一個手段,高官柴娃娃,無一個係市民角度出發,源於我哋無投票權,失敗嘅制度令高官根本無需要同市民交代,好驚好失望,但呢兩次嘅運動令我有一絲希望,中共想用 50 年不變去慢慢分化我哋,新移民去溝淡我哋,國民教育去染污下一代,卻反而令學生對政治早一步認識。現在我們要對不公平,損害香港價值的時候要站出來抗爭,為下一代努力,同時我哋同樣用 50 年教育下一代、下兩代,希望佢哋勿忘初衷,有機會從政,一改現在管治的風氣,希望,希望我可以見到呢一日,可以見到更美好的香港,香港人加油。

 

(標題為編輯改擬,原題為〈直到 2047〉)

發表意見