立場新聞 Stand News

北上會計師的苦況

2016/3/4 — 16:51

資料圖片

資料圖片

【文:杞子@ 進步會師】

今日有好多香港人依然認為中國一定會「睇」住香港,因為做「父母」嘅緊係想「仔女」繁榮同安定。事實上係唔係?筆者沒有做過具科學性嘅調查和研究,但從一些上咗大陸工作嘅會計師樓同事的經歷,卻可見一二。

筆者認識一批四、五年前在大陸才升為審計部老闆 (Partner) 的同事。他們也算是其中最慘嘅一批。首先,在四大會計師樓一榮升為老闆,就要由 “junior” 做起,最難搞和high risk嘅 Account就會送到去你個盤 (portfolio)。香港出身嘅會計師對審計工作一般都較嚴謹,依足守則…咁就麻煩了,因為你的客戶會向你的大老闆投訴你;你的大陸team會認為你煩、你傻和不認識中國嘅國情。因此他們未必會真。做你的要求。

廣告

先幾年香港註冊會計師還可以簽大陸企業份audit account時,這些新老闆都會有得震冇得瞓,怕審計程序未夠認真,所以有很多時都會自己落手落腳去做detail  work。結果,同客戶正經傾野嘅係你,同客戶唔正經傾野 (如隊酒) 果個又係你,做detail work又有你份,一於係做到氣咳。

最近幾年,大陸決定唔準香港註冊會計師簽大陸企業份audit report。一時間,呢一班新老闆 (香港人) 嘅價值大大下降。或許,你和客戶已打好了關係,所以一時三刻還可留在個team。但當你熟d嘅阿總一離開,咁就大鑊,(特別係自習總上場後,國企d阿總不斷被撤、被拘捕、被整)。你一手悉心調教出嚟嘅同事,或者都希望你可以盡快離開個team,咁樣,佢哋便有多一分升職嘅機會。

廣告

有在香港和內地同時上市的企業,其幾位C-suite阿總被換(稱捲入貪腐案)。負責決定是否出無保留審計意見(clean audit report) 的並不是負責這個Account 的老闆(香港人),而是大老闆和管理層。其實咁做都有道理,因為新老闆經驗尚淺。不過,雖然新老闆唔可以做決定,但個名都係由新老闆簽。即是,有鑊時,好有可能係簽名果個「孭飛」。

由於有不少大陸企業同時在香港、內地和海外 (如美國) 上市,所以在大陸會計師樓工作嘅香港人老闆,仍有一點生路。可是,大陸也一步一步減少這一批香港人嘅生存空間。例如,2014年大陸便提出禁止香港會計師在內地工作 (唔係講緊簽account,而係d  junior會計人員去大陸做audit work都唔得)。雖然個提議最終被撤回,但從大方向而言,香港嘅會計人員在大陸嘅飯碗會不斷被威脅。

在外國已經開始有聲音質疑有些在海外上市的大陸企業其審計報告嘅可信性。因為他們都開始發現縱使份audit report係香港四大會計師事務所簽發,但其ground/ field work卻並非由香港會計師事務所嘅人做,而是由大陸firm做。

其實,就算你在香港執業,簽audit account時你可能都係一樣咁擔心。因為近年在香港上市嘅大陸企業,雖然帶旺咗香港嘅股市,但audit佢哋盤數,都係好high risk。從聯交所在2016年1月31日發佈嘅「有關長時間停牌公司之每月報告 (主板)」 中,22間因被發現涉及違規行為及/或被監管機構調查而被停牌嘅公司有19間係中資/民企背景嘅公司。有公司被停牌達四、五年,其中有多於一間公司上市不到兩年便被停牌。作為這些公司的audit team,你又點處理?你唔做 (例如辭任這些公司的auditor),總有會計師樓會接 (中資背景會計師樓?) 到底香港嘅會計師可以點做先能在逆境中再發展?

發表意見