立場新聞 Stand News

北京肯為保梁付幾多代價?

2016/4/11 — 7:19

梁振英週五晚上接受傳媒訪問,解釋「行李門」事件。(TVB新聞截圖)

梁振英週五晚上接受傳媒訪問,解釋「行李門」事件。(TVB新聞截圖)

梁頌昕「行李門」鬧成國際新聞,唔單止反映梁氏一家犯眾憎,更反映出689為人處事能力之低,無人能及,算罷啦,仲想做多五年。一件芝麻綠豆小事在佢手上都會變成危機,香港唔走上所謂「分離主義」之路都幾難。

「行李門」成件事就係一個字:Stupid!由個女到老婆以至佢本人,都係蠢到加零一。權貴子弟搭飛機出問題,無日無之,有時行李超重,有時趕唔切登機,亦有留低手提在安全檢查,唔信問一問國泰傳訊部門負責人就知。問題係其他權貴係唔會高調,更絕不會低能到同前線員工嘈,而係會直接搵航空公司高層處理,而高層會作衡量,若身份敏感會直接作指示,絕不假手於人,以免人多口雜。其實航空公司有protocol去處理「特殊事件」。所謂酌情權,係由高層決定是否運用,你同前線員工嘈,只會令問題無法解決。

梁氏一家所以乞人憎,係以為任何人,包括前線員工都要畀面識做,特事特辦,機場問題機場解決。所謂VIP行使特權之遊戲規則,個女唔識,個老婆都應該識,老婆唔識,689都應該識,哈,結果竟然係689直接同現場員工對話,咁就必死,因為此舉就是施壓,在互聯網時代,掌權者行使權力本來就要加倍小心。689能力稍為高番些少,就要喝令乖女、老婆收聲,並立即收線,跟手叫白宮發言人打畀國泰高層,假如白宮發言人正在忙着同網民駁火,叫特首辦主任邱騰華去做,一樣得,件事保證一分鐘內順利解決兼且無手尾跟。

廣告

鬧劇之所以成為鬧劇,是荒謬愚蠢一而再地發生。事情披露後群情洶湧,政府內部團團轉夾口供為事件降溫,淡化施壓及特權行為,結果再度搞出個大頭佛。若果成件事由航空公司孭起,表示佢哋行使酌情權,由地勤處理經安檢後送交梁頌昕,咁件事就完,輿論最多鬧國泰大細超,頂多一日就過去。而機管局就講大政策原則,毋須進入事件細節討論。但保安局局長黎棟國、民航處長羅崇文護主之心太過急切,又或者心知方丈為人,怕佢小器,於是上立法會事務委員會時出力為「特權施壓」消毒洗刷,點知力度太猛,講到好似人人都可以享有此特權,毋須親身領取遺失行李,於是傳媒記者立即放蛇,再度踢爆,一件小事最後就這樣連累成個政府賠上公信力,乖女遺失件行李就令成個政府燒通頂,這就是689的能耐!

在北京掌控大局下,香港特首在重要問題上要聽命中央,這是政治現實,而特首在執行時,亦要有相當政治技巧,說服香港人,而要做到說服工作,前提是說話有公信力,態度唔乞人憎,做起事來要注重執行細節。689的能力與作風,剛好相反,真係以為特首大晒,用把口講完所有嘢就自動發生,做唔到就諉過於反對派或肥佬黎從中作梗,然後就要求中央表態撐場。中央要求佢處理佔領後年輕人問題,佢就大鑼大鼓派李國章、何君堯、劉炳章等一班「左嘴炮」去大學開片劈友;中央要佢留意港獨問題,佢一樣大鑼大鼓在施政報告中砌港大《學苑》,結果問題不單冇解決,而且加倍惡化。

廣告

「行李門」一件小事都可以搞到咁樣燒通頂,未來北京為要保一個梁振英,究竟仲可以付出幾多代價呢?

 

原刊於蘋果日報

發表意見