立場新聞 Stand News

區議員背景調查報道系列:地區事務 阿爺話事

2015/5/29 — 14:41

當區議員又係人大政協,當雙重身份有矛盾時,佢哋會幫香港人嗎?區議員除左管理地區事務外,仲可以角逐區議會功能界別(即係葉國謙個位),同埋超級區議會議席之外,民選區議員在選舉委員會勝出,仲可以提名同選出行政長官。都不知幾大權!

毫無疑問,建制派主導咗區議會,特首選舉委員會嘅所有委員都係建制派囊中物。啱啱嗰屆行政長官選舉,1200個選委入面,有121個係屬於區議會界別。搵吓佢地背景,原來有約五分之一,即係24位,身兼現任或者上屆人大同各級政協代表。有啲出任政協嘅地方仲係估你唔到。

廣告

最大粒嘅應該係陳振彬同陳婉嫻。觀塘區議會主席陳振彬,之前係廣東省政協委員,而家係港區全國人大代表。陳婉嫻就係時任同現任港區全國政協委員。

陳曼琪喺佔領運動期間,代表潮聯小巴公司向法庭入稟申請旺角禁制令。佢係黃大仙區議員,同時係湖南省政協委員。再遠少少,南區區議員林啟暉都係山東政協!不過都唔夠 Tree Gun勁。

廣告

原來,鍾樹根係哈爾濱政協,真係驚喜到一個點.......《文匯報》2012年訪問佢,佢話佢係當地第一個名港人政協。哈爾濱正積極發展IT工業,需要知識同人才,希望自己幫到香港IT界到內地洽談合作事宜,及發揮自己所長,為國家服務。(http://goo.gl/HOaQzG)

結果,舊年年尾,佢喺《2014年版權(修訂)條例草案》會議上,死都話「串流」等如「下載」,下載就係違法。睇過片嘅朋友都知,串流係指經網路分段傳送資料,唔涉及下載。(http://goo.gl/MF8f0P)

地方政協有幾大影響力真係唔知,但係立場要緊跟北京就冇走雞。當香港人的福祉同大陸嘅有衝突嘅時候,佢地會唔會如實反映香港人意願?
 

原刊於作者 facebook page

發表意見