立場新聞 Stand News

區議會會務系列 (一)不要問,只要撐

2015/7/18 — 23:19

區議會透過大會會議、委員會及工作小組,向政府提供地區意見、改善區內環境同舉辦康樂活動,基本上同政治冇乜關係;不過,萬一遇上政治議題,由建制派把持的區議會就會露出不理民意、盲目保皇嘅真面目。

以今屆東區區議會為例,佢哋每隔兩三個月開會一次,截至今年7月合共開咗20次大會會議 。頭一年都好地地,大部分會議時間都係向各政府部門反映區內問題;但最近兩年嘅8次會議,其中6次都花咗一個鐘或以上時間去討論「支持國務院發表的《「一國兩制」在香港特別行政區的實踐》白皮書」、「支持依法普選2017行政長官」、同埋「促請社會各界在符合《基本法》及全國人大常委會的相關決定下,盡快就2017年普選行政長官的方法達成共識」等議程,之後更以大比數贊成通過。

廣告

區議會話哂係民意代表,討論重要議題無可厚非,但當時支持同反對「袋住先」嘅民意明明不相伯仲,民調更曾出現過反對較多嘅「黃金交叉」,如果區議員真係代表地區民意,點解遇上政治議題時會漠視民意,只係一味重覆「行政長官必須『愛國愛港』是市民的共識」,一面倒硬撐政府?甚至叫不認同白皮書嘅人離開香港?

呢個故事教訓我哋:唔好以為區議會淨係搞地區事務,去到大是大非嘅問題佢哋係會隨時變臉。

廣告

小編真心呼籲︰如果唔想「被代表」,嚟緊區議會選舉,除咗睇地區政績,記住睇吓候選人嘅政治取態!

 

原刊於作者博客

發表意見