立場新聞 Stand News

區議會與公帑系列:區議員津貼係咪用得其所?

2015/6/11 — 13:41

圖片由「2015選戰 顛覆區議會!」製作

圖片由「2015選戰 顛覆區議會!」製作

做一個區議員,除左有人工,每年政府都會提供實報實銷津貼,話多唔多話少唔少。選民希望區議員能夠善用呢筆公帑,唔好大花筒。不過,間唔中都會有報紙踢爆,區議員辦事處買左未必好實際嘅野,或者亂開項目。

由2014年1月起,區議員實報實銷嘅營運開支償還款額,由每年304,704元,增加34%到每年408,000元,即平均每月34,000元。如果還款額有剩餘,可以撥入下個年度,直至屆滿。另外,連任區議員如果喺之前嘅任期內,已申領呢項開支償還款額,但喺現屆任期內需搬遷辦事處,申領款額嘅上限,由 50% 增 至 100%,最多為10萬元。

政府提出嘅理由,係區議員辦事處租金、助理薪酬以及其他營運開支上升,不少區議員認為要改善現行酬津安排,以有效履行職務,尤其是租用私人樓宇單位營運辦事處嘅區議員立法會財委會喺2013年12月通過增加撥款

廣告

有報章調查發現,有幾位身兼立法會議員嘅區議會議員,運用嗰筆開設辦事處津貼,購買新款電子產品。

例如,工聯會麥美娟去年九月,用咗四千多元購入推出唔夠半年嘅Sony Xperia Z2手機,而郭偉強就以近六千元買入HTC M8手機。另外,民建聯葉國謙就用六千多元買入一部iPad mini,新民主同盟嘅范國威就用8400幾蚊買一部MacBook Air。報章引述范國威,指他身兼設計師,一向用開MacBook自行設計工作報告同宣傳品,認為咁做反而慳反聘請設計師嘅費用

廣告

同類情況,上一屆都有發生。另一份報章做過類似調查,指自由黨東區區議員顏才績,花8萬元買左 iPhone、 iPad、 iMac等產品

正如第一段講,以前區議會用剩左營運開支,唔可以撥入下個年度,咁區議員就要諗辦法,年度完之前洗駛筆錢,例如盡用津貼支薪。上屆深水埗區議會主席陳東,區議員陳鏡秋、黃達東等五名委任議員合租辦事處,分擔辦事處同員工開支。之前兩年佢地因未用盡營運開支限額,於是派發「年終獎金」。2009年其中一名月薪14,500元嘅助理就收到39,200元年終獎金,多過雙糧金。上一年都有發兩個月花紅俾助理


【地區事務 阿爺話事】區議員背景調查報道(一)

【青年投票率遠低中年和長者】區選前瞻系列 (一)

發表意見