立場新聞 Stand News

十二碼有兩個可能性… 咁 300+ 選委呢?

2017/1/16 — 22:00

作者提供圖片

作者提供圖片

林鄭同曾俊華辭職,卒之北京同一時間批准。左報不斷吹風話林鄭即批,代表中央就係欽點佢。其實北京特登同一日批,即係要佢地兩個同一時間起跑,表面上睇公平啲嘛,當然,係表面上公平。

***************

呢掛非建制嘅圈子開始討論緊300+(即係非建制選委)應該點投票呢個問題,咁當然就係有排拗。

廣告

大家其實都知道一個事實,就係所謂選委300+嘅最大公因數只係ABC,而且呢三百幾人唔係同一個組織,而係唔同嘅界別代表,佢地選嘅時候絕大部分唔係承諾投白票或者指定投邊個。

如無意外,某啲界別會訴諸界別內民調,佢地唔會俾任何人夾到,所以所謂300+共同行動好難出現。既然林鄭擺到明係奉行梁振英2.0路線,咁而家ABC好容易變成Anyone But Carrie,ABC選委要向界別交待,起點只係ABC。本來唔係基進嘅界別,好難要求佢地進。佢地邊度進?

廣告

***************

選委300+其實係一個以ABC 為最大公因數嘅鬆散陣營,當中由行業界別選出嘅選委面向嘅係自己界別,最難以基進理念夾實。

其實夾唔夾實、白唔白票,有好多個變數,例如:

1. 提名期

i. 如果個個參選人都拎到150或以上提名,咁冇咩好討論。
ii. 如果有候選人唔夠提名,需要300+裡面嘅提名,咁俾唔俾?如果有啲界別選委嘅政綱係主打ABC,提名同投票取向都係ABC,咁真係應界別嘅民意俾提名都冇違反選舉承諾。咁當然,泛民主派議員就真係唔好亂嚟,佢地要面對嘅係佢地嘅選民。

2. 提名後嘅「選舉」

其實而家拗投唔投俾邊個、投唔投白票,都有好多個scenario。

i. 如果北京控制到600+投晒俾一個人,咁真係乜都唔駛講,300+甚至應該唔好行入個投票場地明志,免得一陣俾人懷疑有人西瓜靠大邊R著數。

ii. 如果北京控制唔到600+,假設唔係非泛民嘅800幾票真係分散到冇一個人可以過600票,咁300+就有存在價值,至少有兩個可能性:

a. 唔俾票搞流選;

b. 俾票一個佢地認為比較能夠接受嘅人。

正如我之前講,300+唔係一個統一指揮嘅陣線,界別選出嚟嘅選委,有可能會響界別民意壓力下有條件地選擇b,因為如果唔投票,結果連ABC都做唔到,呢個可以俾人鬧足廿年。

如果係a.,之後嘅結果會係點真係好難講,相信呢個會係非溫和泛民選民想見到嘅情景,所以相信非溫和泛民議員好難會選擇b。對於溫和泛民議員嚟講,其實咁樣endorse一個同北京有關係嘅人做行政長官,日後都幾乎肯定呢個人會跟隨北京指揮施政,只係嘴臉同手段會有分別,咁溫和泛民就會將自己同行政長官民望掛勾。

***************

咁當然,提名之後嘅投票理論上係匿名嘅,除咗冇入場嘅人,冇人知邊張票係邊個投。如果真係有成三個候選人,啲票點樣投,啲選委可以三緘其口。

上面嘅分析講到好似你班人真係知道有冇人一定600+咁。實際上啲票數大約嘅分佈,未到最後關頭分分鐘都未知,傳說中北京最後嘅指示會點俾法都未知,正正因為咁,而家唔同界別嘅300+選委根本commit唔到任何嘢。

坊間仲有一個陰謀論,林鄭vs胡鬚曾可能係夾溫和選委歸邊嘅計謀,而家習核心啲嘢咁難估,人人都有消息人士,子彈唔再飛一會都唔知風吹邊面。

以上嘅分析,都係根據大家都知嘅資料講,某程度上都係同分析十二碼兩個可能性差唔多,大家都唔知最後嗰「一人」嘅「一票」最後會點,總之就呢舖帝王之術搞到你地頭都大埋。

補多句,今日陳茂波終於做咗財政司司長,真係恭喜晒,比較可惜嘅係吳克儉做唔到政務司司長。

 

(原題為:十二碼有兩個可能性… 300+選委應該唔只;作者博客

發表意見