立場新聞 Stand News

千億綠債空白支票 永續基建劍指東大嶼

2018/11/14 — 19:22

環境局局長黃錦星(圖片來源:黃錦星 Facebook)

環境局局長黃錦星(圖片來源:黃錦星 Facebook)

今天下午,立法會行將強行通過至少 $1,000 億的綠色債券議案(議程第四項,約於五時後開始,視乎其他議程進度)。

繼陳茂波「東大嶼考慮發債論」之後,環境局局長黃錦星又有「大嶼加大保育力度,建立零排碳新發展區」的講法。種種跡象顯示,綠色債券明顯與東大嶼項目有關。

現在再簡略小結幾點︰

廣告

1. 政府發綠債啫,冇話關東大嶼事喎?

基本工程儲備基金是工務工程的帳目,宜整全理解。即使只為無爭議性、有環保效益的項目發債,實質上仍然等如增加了基本工程儲備基金的財政實力,令有爭議性的大白象基建,更有推動空間。

廣告

發債,就是為未來賣地成績波動的風險,提供重要的調節,令萬億東大嶼再無後顧之憂。

2. 東大嶼填海填到咁,趕絕海豚,咁都環保,唔會係「綠」啩?

星星局長已露口風,同埋,即使填海唔綠,配套工程可以好「綠」。

任何工程,加入一點點再生能源,即刻變綠。任何鐵路,無論是否有利民生,都可以計到「減排效益」(相對巴士而言),成為「綠色工務」,利用今日這個綠債議案集資。

3. 張建宗話十年至少用一萬億做基建,咁一千億好快用完啦,好濕碎啫?

一千億今時今日對於不斷擴充規模的基建,或者真係杯水車薪,但事實上個議案措辭,佢唔係發債 1,000 億,而係可以循環貸款,還咗 500 億又可再借。

簡單講,發債總額係冇上限。

4. 咁綠色工務究竟係咩?

冇人知,政府官員死都唔肯講。

綠色工務定義?唔知。
發債計劃詳情?唔知。
發債總額上限?唔知。
幾多利息行政成本?唔知。
賣俾「機構投資者」定係巿民?唔知。
個別項目發債定係類別發債,定係發咗債先決定做咩項目?唔知。
對公共財政有咩複雜影響?唔講。

總之政府就係寫一個最大彈性(彈性大到根本係錯的)的議案,如同「空白支票」,嚟立法會打劫,然後一勞永逸。

環保?其實嗰啲係政府工程,當局可以全權控制,從來唔駛透過發債做環保囉。發咗債都不會增加咗動機。

最終支票填咩銀碼?你理得我吖。

作者製圖

作者製圖

 

作者 Facebook

發表意見