假才子

假才子

比較政治碩士學歷,現為傳媒工作者。「假才子」是因為現在流行才子才女,但又沒人敢承認自己是假大空才子才女,故先行澄清。文章寫得不好還請見諒,畢竟我不是真才子。

2019/10/7 - 18:26

反對暴力,更反對暴政

立場新聞圖片

立場新聞圖片

港府宣布反蒙面法後各區再次爆發示威,不少政府建築物、港鐵及商店遭到破壞,林鄭翌日又發表錄影片段譴責暴力,呼籲市民同「暴徒」割席。筆者的回應就係,我反對暴力,但更反對暴政。

我以往在個人 fb page 上都講過,我的原則並非反對所有形式的暴力,至少自衛性質,人地打你時你作反擊以自我保護,我係可以接受的。當然,近日的對市面的破壞就超過依個原則了,我無法講我好支持依種做法。但就算係咁,我地都要諗返,依家一部分示威者變到咁暴力的根源係咩造成。

使用暴力,不一定是非理性,情緒化或洩憤的,使用暴力都可以是經過考慮後所作的選擇。正如打仗,夠暴力啩,但打仗所涉及的計算先多呢。又睇返,依家的破壞並非無邏輯的,並非間間舖都受攻擊,亦冇大規模搶掠,而係有針對性,經過計算的。

廣告

香港過去幾廿年的示威都係和平,係最近幾個月暴力先明顯增加。使用暴力的示威者並非一開始就愛暴力,係曾經參加過和平示威,但認為冇用,政府唔會聽和理非,只會用警察鎮壓,所以依家選擇咗暴力。簡單講,沒有暴政,沒有暴力。所以反對暴力,更應反對暴政。

而最新的反蒙面法,或者更準確講,係背後的緊急法,仲衰過 23 條同反送中,令港府更加向暴政邁進。就算閣下係深度和理非,不被之前關於暴力示威者的講法打動,如果你反對過 23 條,反對過送中,咁依家你更應該出來反對緊急法。

送中衰過 23 條,因為 23 條雖然係衰,但始終有明確範圍,同埋係香港審返,而送中範圍更大仲係返大陸審,更易中招兼一中死多幾錢重。緊急法更衰,因為政府直頭話有需要就可以立法,唔洗經立法會,佢叫就得,惡法放題,仲立即生效。政府可以任意為佢需要扭曲法律,完全違反法治最基本要求的任何人,包括政府,都要受法律約束。佢話緊急,又可以一日過送中;佢話緊急,一日過國安法:佢話緊急,拘留時間加長;佢話緊急,限制網絡;佢話緊急,戒嚴宵禁;佢話緊急,押後選舉……

邊個話唔得呀?當年國民黨宣布「動員戡亂」,總統命令可以不受憲法限制,由國共內戰 1948 年到台灣民主化 1991 年,「動員戡亂」咗 43 年,當中冇舉行過立法院換屆選舉,到 1991 年仲有立委係 1947 年當選的老人家呀。(但有補選,因為都好多人老死咗。)林鄭已經講咗,政府研究緊各種現行法律下可用的手段,咪預示咗會有權用盡囉。

靠 JR(司法覆核)呀?首先香港 JR 搞咁耐,人地英國首相 Boris Johnson 解散國會,反對派提出 JR,法院急事急辦,到終院終極宣判只係用咗三個禮拜,香港立法會選舉 DQ 案就要審年幾兩年,都就嚟下屆選舉添啦,JR 引用緊急法的法律都唔知要搞幾耐,到時唔知幾多人被打盲甚至打死咗啦。就算好彩贏咗,一個人大釋法就收你香港法院皮啦。

所以大家一定要繼續,不論和理非定勇武,目標一致反對同要求撤回惡法,否則用緊急法一開先例,政府為所欲為,惡法放題,真正暴政降臨。

 

作者 Medium