立場新聞 Stand News

叛艦船長為何可作惡?

2015/10/26 — 7:26

𠵱家睇新聞越多,越懷疑自己精神失常。

習近平在英國演說話中國以人為本及法治歷史有四千年,真係好有創意,四千年中國信史都未開始,夏朝是否存在未有定論,何來人本思想及法治,按馬克思史觀,中國當時係奴隸社會。

翌日立法會答問大會,梁振英乜都唔答,惟獨垂青毓民代選民問特首幾時死,而最神奇係曾鈺成又唔阻止,689又滿有信心有晒準備,拋出毛詞「牢騷太盛防腸斷」,呢首詞乃香港七十年代毛左「通識」,勞校小學生都識念,六十、七十年代用到殘,那陣老土味𠵱家內地都敬而遠之,除毛左憤青論壇。香港真係有保育精神,特首將老左陳腔濫調拿來當金句。

廣告

跟着就輪到行會召集人林煥光,入去中大主講領袖學,竟然用《叛艦喋血記》做主角,講述十八世紀在大溪地發生嘅英國軍艦叛變事件,嘩,咁大膽,明寸689如叛艦船長嚴苛有權用盡心術不正。再跟住就到梁錦松接力,苦口婆心勸喻唔好再搞鬥爭,又係衝住689。

估計未來半年,越來越多呢類「膏藥式政客」,噏得出就噏,抽乾689水為止,今次真係風水輪流轉。如果北京堅係挺梁連任,就唔應該有咁多抽水人物出現。政圈傳出連恒基四叔個大公子都摩拳擦掌,要幹一番大事咁話,相信「連任無望膽自大」之謠言一旦廣泛流傳,心思思去馬之人就越多。但689性格遇強越強,當年港澳辦都無法勸退,今次更加大權在握,點會任由北京話事。半年來已展開競選工程,就係有權用盡繼續鬥,學習偶像老毛不斷拉高矛盾,一分為二,逼人歸邊,而令北京陷入被動,在同英美外國勢力勾結泛民試圖奪取香港管治權的嚴肅鬥爭形勢下,焗撐梁振英。

廣告

所以整治法界及知識分子呢條戰線會毫不放鬆,李國章接任香港人民大學黨委書記後,就會進入新鬥爭階段,深入各個學系、學院及教師續約、升遷,鬥倒一個陳文敏只是開端,小勝一仗。另一反動知識分子基地中文大學,要夾死特首黑馬人選沈祖堯校長,令佢大失民心,兩面不是人,老江湖梁乃鵬接鄭海泉,並非合適人選,梁唔夠左,愛惜羽毛亦唔夠勇,其實689身邊呢款悍將,除李國章外,另一行會成員羅范或張志剛都唔錯,舊電池劉遵義也是人選,既做過中大校長,又敢於亮劍不顧身份地位怒斥一眾「小壞蛋」。

搞大學生,整治知識分子在政治上有殺雞儆猴作用,傳媒關注,可收宣傳之效,再者對付本土主義抬頭的學運,由根本入手,掌控大學管理,符合北京強硬路線。政治鬥爭猶如女優拍AV,一旦跨過條底線,就只有越來越重口味,越來越癲,無法再回頭。

叛艦船長可以作惡,唔係因為權力大,而係因為一盤散沙,大副二副各懷鬼胎,食花生抽水做塘邊鶴。傳媒人一個一個被迫走,大學一間又一間倒下,逐個擊破。英殖培育出來所謂精英講文明、講身段,又何來叛變勇氣,林煥光連船都唔敢跳!繼續做船長手下二副,而大副林鄭則拔劍斬向批評船長之泛民,香港呢條船唔沉都幾難。

原刊於蘋果日報

發表意見