立場新聞 Stand News

古惑仔體制

2015/9/14 — 8:50

張曉明(資料圖片)

張曉明(資料圖片)

張曉明所謂特首地位超然,在中央之下,高於三權之說法,乃習近平三權合作論的進化版。三權合作團結在特首身邊,追源溯始,應是英治港督憲制地位的華強北山寨版。港督向英國執政內閣負責,超然於殖民地三權。三權合作的美好時代是八十年代OMELCO system兩局體制,行政立法重疊,問題是香港未脫離殖民地時,已逐步走向民主化,九一直選後行政立法分家,互相制衡,九七後特首及三權分工亦清楚寫入《基本法》,你叫做三權合作也好、或三權分立也好,都只不過屬口水嘢。

強世功、張曉明等人如果有睇《古惑仔》電影系列,事情就簡單得多,唔會搞到一塌糊塗。用古惑仔對白演繹張曉明口中所謂「特首地位超然體制」,應作如下表述:「袋巾、卿姐、鈺成、道立、林鄭,你班人同我聽清楚,銅鑼灣呢個地頭,係蔣生交畀浩南做揸fit人,佢代表阿公去管,總之凡係社團吹雞要浩南幫拖,大家識做就唔好阿支阿左,要一條心撐佢,撐佢即係撐阿公,識做嘅話其他馬檻、泊車仔、老翻同桑拿,就畀番大家自己管。」香港人當堂明晒,唔會大嗌:「好亂呀!」

但佢哋要扮理性,扮講法治,於是就用一套法律語言去包裝「古惑仔體制」,結果搞到風波不絕。去年先搞出一份國務院白皮書,又搞一個8.31決定,香港輿論譁然,為佔中推波助瀾。今次有關行政長官有獨立政治角色,其實根本冇乜爭議,其權力也寫在《基本法》,如何受立法會制衡,也一清二楚,一睇就知。特首能否成為三權核心,問題根本唔關乎其法律地位,而在於其政治操作過程、能力及民意支持。張曉明指特首雙重問責,既向中央負責,又向特區負責,真正意思係當特首執行中央指示時,三權應合作支持,佢又怕講得太白太露骨,所以變成亂噏。

廣告

要確立特首核心地位,先要處理好政治權力運作,即政治體制問題,港人治港表現令人失望,在於體制不合理。首先行政立法冇建立合作機制,衛奕信、彭定康何嘗唔頭痛,政府在議會內冇票,因為缺咗政黨作中介,西敏寺模式由多數黨組閣執政,確保行政機關提案在議會得到支持;美式總統制,總統權力來源獨立於議會選舉,有直接民意授權,即使議會內反對派佔多數,都可直接訴諸民意,壓制議會。

《基本法》下政治體制三不像才是一切問題根源,既非議會多數黨領袖當特首,又非美式總統內閣制,體制不完善,只有靠人治及潛規則運作。其實用「古惑仔體制」,靠大家「識做」來操作,本來暫時解決到問題,但呢個體制要有效,只能做不能講,一見光就死。而最重要係中央都要「識做」,畀特首有政治空間,唔能夠將佢變成「Yes man」,被港人視為中央或西環「凡是派」政治傀儡。正因為雙重問責,先要「好女兩頭瞞」,特首在特區冇民意支持,試問何來足夠政治能量執行中央交託的任務呢?越被人認為一切靠中央,特首地位就越低,出嚟行邊有人畀面佢本人,何來超然地位。浩南做到銅鑼灣揸fit人,唔可以單靠蔣天生支持,仲有一班「洪興仔」出生入死及區內陀地幫手。

廣告

經歷梁振英三年零八個月管治,莫非北京仲唔明白行政主導並非靠空洞條文,要係靠體制內嘅人。當制度未完備,人嘅因素最重要。一個凡事依靠共產黨,冇能力爭取建制力量及民意支持,動員本地政治力量落實爭議施政嘅特首,只會不斷削弱特首政治地位,人見人藐,仲想叫佢做超然至尊特首?不如叫魯芬去選港姐吖笨!

刊於蘋果日報

發表意見