立場新聞 Stand News

只有理念得到咩?梁振英2.0?我唔要,我要策略!

2017/1/20 — 8:01

曾俊華, 林鄭月娥

曾俊華, 林鄭月娥

有啲觀點,真係好難理解。今日好多人撐薯片,完全係因為形勢所迫,但有些人會以呢個舉動,來否定雨傘運動對普選的追求和推倒政改,例如話,如果大家其實咁想揀鬍鬚,咁當初做乜要推倒個政改呢?點解要搞雨傘呢?

好多人強烈要否定政改,係拒絕呢個不民主的制度,而唔係想邊個邊個當選,當時形勢係根本唔知邊個選,仲以為梁振英一定會選添,依家用今日的形勢來否定推翻政改的決定和對普選的追求,完全係屈機,唔公道。

還有,你在政改一役拒絕咗嗰個制度,唔係返回"無制度",而係延續另一個不民主制度,好喇,咁你有兩個選擇,高叫杯葛投白票,或在這個制度中揀出一個似樣少少嘅。依家有人揀後者,竟然被屈成"你咁想薯片贏使乜否決個制度"?夾硬將兩件事捆埋一齊,唔公道。

廣告

即係咁,今屆立法會選舉,今屆選委會選舉,民主派在功能組別搶咗好多灘,我可否在旁加一句:"挑,你哋咁支持功能組別投票,咁支持選委會選舉,早知唔使年年嗌取消功能組別啦,咩"我要真普選"都忘記晒,使乜搞雨傘?抵你哋香港冇民主!"?

今屆好多人在超區投逗號,令佢做咗票王,你估真係好多人想揀逗號?好多人頂唔順逗號。咁我係咪好似熱普城咁,叫人全投白票廢票,等王國興當選?唔係,我仍然叫人去投逗號!點解立法會識咁玩,特首唔可以咁玩?連提出都要被屈成係"唔再支持民主普選"?唔公道!

廣告

係,理念係崇高嘅,我由2003年七一大遊行開始,一直默默參與各種群種運動,今日一把年紀了,只高舉理念的民主派爭取到甚麼?爭取咗梁振英?你們民主派的質素真係越來越高?唔好每次用理念高高在上來批判我哋呢啲選民,其實我哋好多人都好唔想選你哋某啲人,但我哋係支持民主普選才迫住選你哋,係形勢所迫,等於撐薯片都係形勢所迫。

唔好用理念來教訓我哋,我哋對普選嘅追求冇變過,但只有理念得到咩?梁振英2.0?我唔要,我要策略,我要同梁振英路線不同的候選人,我要最仆街嘅西環輸,然後繼續爭取民主普選。

Sorry,呢段話又得罪人,但都要講!

(原刊作者facebook)

發表意見