假才子

假才子

比較政治碩士學歷,現為傳媒工作者。「假才子」是因為現在流行才子才女,但又沒人敢承認自己是假大空才子才女,故先行澄清。文章寫得不好還請見諒,畢竟我不是真才子。

2018/7/4 - 16:24

只許州官英國護照 不許百姓英文提問

背景圖片來源:rthk片段截圖

背景圖片來源:rthk片段截圖

早排「特金會」已經慨嘆過,政府同親中派自己冇國際視野,將香港由「國際都會」降格成「大灣區城市」,依家又要嘆多次了。咪因為林鄭話講英文「餵屎貪」(waste time)囉。

其實眾所周知,香港好多外國人或前外國人定居㗎嘛,例如林鄭佢屋企人啦,Package Lau、陳智思、陳啟宗、梁君彥、薑融啦,仲有「范婦人」同「豬姐」等等,多不勝數,未能盡錄。唔用英文,略有歧視之嫌囉。

就算唔講係咪歧視,我怕開咗個頭講英文係「餵屎貪」,遲啲印英文文件係唔環保,路牌印英文係嘥位,地鐵英文廣播又「ar」時間,請英國法官又嘥人工,甚至學校英文堂都係「餵屎貪」。反正親中派咁唔中意英國法官,正好藉機將佢哋炒魷。政府咁中意洗我哋香港細路的腦,一於將英文堂改晒做習思想堂。

廣告

有朋友問,如果 CCTV 記者要林鄭用普通話又係咪「餵屎貪」。咁就梗係唔係啦。時代唔同嘛,轉咗老細嘛,「國際都會」變咗「大灣區城市」嘛。以前殖民地時代,識英文唔識中文就係高等華人,依家變咗識普通話唔識廣東話至係高等嘛。我估林鄭遲早話用廣東話係「餵屎貪」,索性全部答問用普通話,等習總開 CCTV 時聽得到嘛。

我仲諗到一招,就係出動張建宗。皆因張建宗的普通話同廣東話係一樣的,出動佢就可以同時滿足哂普通話同廣東話記者了,幾方便呢。不過學某電視台記者話齋,政府同親中派唔好講咁多廢話就最唔「餵屎貪」了。

 

原刊於作者網誌