立場新聞 Stand News

叫佢哋「親共派」,唔好再講「建制派」

2018/1/30 — 14:38

周庭、姚松炎

周庭、姚松炎

連周庭都被DQ,實在怒火難撳。戰幔經已拉開,不才忍唔住想講吓點同班賣港賊對打。

不才唔知道民主陣營有無公關。思維觀念傾向民主陣營嘅人,一般上都係鍾意做人最緊要夠「真」,公關呢家政治化妝術,好似同民主陣營有啲格格不入咁。之但係,香港市民有好多都係睇嘢睇表面,要攞到普羅大眾對民主陣營嘅認同,同埋要攞到呢批睇嘢睇表面嘅市民嘅手上一票,諗吓點樣由公關角度去捉心理同對手鬥過,不才認為都係好重要嘅嘢。

其他唔講,先講吓啲用詞。

廣告

民主陣營依家通常叫對手做「建制派」,之前為咗統合主流民主派、進步/激進民主派、自決派、本土派、港獨派…民主陣營叫自己做「非建制派」。但係叫對手做「建制派」,呢個名實在唔得。

第一,香港哋有好多市民其實都係好保守嘅,佢哋覺得個制度係要保護住,佢哋最唔鍾意嘅就係啲人「搞亂檔」,所以個政府用公關技倆 spin到「拉布」就等於「搞亂檔」,呢類市民就全部受曬。呢類香港市民,包括咗深藍、淺藍,同埋啲無乜特別政治立場嘅人,「親建制」對佢哋嚟講,係一個褒詞,如果你叫X賤聯、X賊會、X民黨呢啲做「建制派」,又或者叫陳XX、鄭XX、鄧XX呢啲扮中立扮持平嘅人做「建制派」,咁香港哋呢批鍾意和諧建制嘅市民,就自不然會揀佢哋啦。所以策略上,民主陣營應該改口,唔好再用「建制派」呢個名去稱呼對手,咁先至有大啲機會搶到啲淺藍同埋無乜立場嘅人啲票。

廣告

第二,「親建制」嘅意思,本嚟係要保住現有制度穩定不變,但依家呢批賣港份子,鬼係保住香港一直以嚟嘅制度不變!佢哋盲撐政府亂咁嚟,法治變人治,破壞曬香港政府以往做事有規有矩嘅傳統,亦破壞咗一國兩制之下香港人本嚟有嘅制度,佢哋啲衰嘢,唉,罄竹難書。不才認為,民主陣營應該解俾香港人聽(舉埋諸如DQ周庭呢啲經典事例去講),嗰班盲撐政府嘅人其實係「反建制」,而唔係「親建制」囉!民主陣營如果可以 spin番轉頭,或者可以令到嗰啲鍾意停留喺good old days 嘅淺藍中年人醒番吓。

第三,「親建制」對唔少香港人嚟講係褒詞,「親北京」就介乎喺褒詞或者中性詞之間,但至於「親共產黨」,嘿嘿,不才肯定有唔少香港人都會由心底裡面唔鍾意(雖然佢哋未必會喺公開場合講到出口)。民主陣營稱呼對手做「親共派」,睇怕嗰批賣港親共份子都唔敢公開反擊話自己「唔親共」。只要民主陣營嘅人說話小心,唔好俾呢個無恥嘅政府有口實將來隨意DQ,咁不停稱呼對手做「親共派」、「親共派」,將呢個啱佢哋用嘅label貼番喺佢哋身上,「親共派」,就會俾更多香港人離棄,甚至唾棄。

 

(本文曾刊於 28.01.2018《眾新聞》)

 

發表意見