立場新聞 Stand News

同土佬鬥,我哋未必輸

2016/9/17 — 16:46

資料圖片:朱凱廸

資料圖片:朱凱廸

朱凱廸事件至今,仍然人人擔心佢安危,所謂利益過唔知幾多個億,有黑社會插手,又有傳聞守新界差佬多數原居民,警黑或者會勾結,但我仍然覺得我哋未必會輸。

無錯,熟悉新界嘅人都知道,班友平時蝦蝦霸霸慣,目中無人,財大氣粗。就算未入過新界接觸過佢地,睇返電視 soundbites ,你就知道係平時惡慣嘅人先會講呢啲說話,就算唔睇新聞,當日流傳圍村仔打收數佬段片,大家都知佢地係咩人。

正正係因為佢地又有錢又惡,所以講嘢諗嘢唔會經大腦,平時梗有班擦鞋仔奉承佢地,佢地出錯既機會自然更大,睇返啲語無倫次,例如:幾多歲之後無樓既人係乜,英國佬都唔怕,革命要流血,官商鄉黑合作。就知班友以為自己天下無敵。正正係咁,佢地出錯機會自然比常人多。

廣告

至於鄉事組黨,我真係笑咗出嚟,班友平時咁乞人憎,神憎鬼厭,非洲和尚,除咗民建聯呢啲建制派會埋佢哋堆,有撚人采佢哋,自己組黨,即係孤立自己。

新界差佬係咪同村兄弟,我唔知,但而家咁嘅情況,單嘢通晒天,唔係全港,係全世界關注,差佬就算係同村,都應該唔敢亂咁嚟。

廣告

梁匪振英亦未必敢包庇佢哋,唔係因為依法辦事,係呢條撚樣只係識利用人,到人踩咗屎,就好似唔撚識人咁,利益團伙,根本唔存在情義或者信念,如果盤算過利害,梁匪隨時「大義滅親」,搞鳩埋佢地一份。

睇返連香港 01 都搞鳩套丁,我地已經知道,大陸應該都對呢班以為自己大撚晒嘅仆街不滿,我地都係食住花生等睇戲,唔駛太擔心朱凱廸。

發表意見