立場新聞 Stand News

同行

2017/3/28 — 14:49

有街坊建議作者多搭的士,作者咁答......

有街坊建議作者多搭的士,作者咁答......

問:你平均幾耐落一次區?
答:其實,我並沒有落區的概念,我本來就居於新界東,日日往返,這算「落區」嗎?

問:點解你搭巴士嘅?無揸車咩?
答:我車牌都無,點揸車呢?其實,搭巴士有咩奇怪呢?我搭咗三十幾年啦!我仲經常搭港鐵和小巴。

問:揸車慳啲時間嘛!
答:唔揸車,坐公共交通工具,我大可在車上處理公務,睇文件、訊息、新聞,回覆電話,善用時間,自己揸車的話,絕不能分心,否則累人累己。

廣告

問:有無人認得你?走埋嚟傾嘢會唔會覺得煩?
答:最近多咗啲市民認得我嘅,有啲點頭微笑,不少人第一句都係話「乜你真人真係咁高㗎」。覺得煩?咪講笑!我係民選㗎,市民肯搵我傾偈求之不得啦!同埋搭車的另一好處係,可近距離接觸市民,尤其早上繁忙時間,坐地鐵,不,「企」地鐵,同市民真正做到零距離接觸,完全感受到市民的呼吸,甚至汗水,非常貼地。

問:請個司機嘛!
答:你鋪話法,我其實趕時間先搭的士,政府每月大約有二十萬元讓議員營運辦事處,現時百物騰貴,同事人工、辦事處雜費和宣傳開支,七除八扣,所餘無幾,而且新界東幅員廣大,北達上水,南至將軍澳、西貢,有錢都請多啲同事處理地區事務啦!請司機太耗費了。

廣告

問:請個司機連保鑣嘛!你得罪咁多黑社會圍標集團。
答:「是福不是禍,是禍避不過」,敵暗我明,如要伏擊,總能下手,縱使伏擊成功,我亦不會封嘴,除非令我永久閉目啦!所以風險應該不太高。何況,我從不走小路捷徑,條條大路,正所謂和香港市民「真同行,真connect」嘛!人馬疊疊,放馬過來。

 

原刊於am730

發表意見