立場新聞 Stand News

吳康民可以算係乜人? 或者應否當佢係人?

2017/1/1 — 10:40

資料圖片:吳康民(now新聞台片段截圖)

資料圖片:吳康民(now新聞台片段截圖)

「距離下屆特首選舉仍有逾1年時間,但前全國人大代表吳康民(圖1)率先表態,他在報章撰文,以3個理據分析梁振英連任的機會,認為香港情況愈來愈複雜,但梁振英駕輕就熟,加上了解國情及獲中央信任,故認為梁振英是連任特首的理想人選 ... 」

摘自《am730》2015年12月31日報道

今年八月時寫的,呼應這貼文,揾番出嚟與大家重温一次。

先講多一句,此人在六七暴動時,多番鼓動佢D學生出嚟搞暴動。到後來北京叫停嘅時候,佢即時當自己冇份。咁多年來,從來未道歉過。當年俾佢搧動嘅學生及員工,好多都有被佢出賣嘅感覺。最無恥嘅就係今時今日仲經常出嚟扮智者,擦鞋擦到上心口。活了一世人,仍然咁冇品,人越老就越無恥。有時仲出嚟月旦別人、想造王。講真,佢仲有資格咩?真係唔知個醜字點寫。大家仲要留意,2017年就係六七暴動50周年,大規模有系統有組織嘅就「六七暴動漂白大行動」已經開始,大家記得留意,千祈唔好中計。

廣告

八月時咁講:

做咗差唔多一世人,仍然唔知乜叫獨立思考。阿爺當年搞文革,佢就喺香港搞暴動。阿爺叫收聲,佢就收聲。俾佢煽出來做爛頭卒的學生同事朋友全部俾佢跣一舖勁。佢幾十年下來就粒聲唔出,當冇事發生過。

最好笑係去到八十幾歲人,早幾年溫家寶搵佢食餐飯,慌死人唔知,又寫文章,又post 相,只欠未跪低三呼萬歲謝主隆恩。嗰個奴材相直頭係當代經典。

無論當權政府做嘅事有幾罪惡,都會得到佢呢類人支持,重會緊跟配合。日日「打倒昨日的我」,完全唔會面紅,重會為自己覺悟快而自鳴得意。中國當代史上好多人禍,佢雙手沾滿了鮮血。老嚟寫埋啲文章永遠都只是呼應大阿哥。要不就是估吓老頂想點,近期發覺唔對路即時變調。成世人如是。識字,但未曾進步過。

根據人類社會心理成長的理論,道德發展仍然處於"good boy good girl" 階段,只是8級中的第三級,心理年齡大慨最多只是十至十二歲,仍未形成獨立人格及個人身份意識。

從某啲比佢晚一輩的土共自己友,例如「閹割Him」等的水平,大致可知為何會有人認佢做「師父」,起碼佢識字,仲有啲煽動能力㖭。有啲人形容佢「德高望重」,只有在中國人社會的土共團伙才會有這樣荒謬的事。所謂「德高」,大扺因為佢哋搞政治從來唔講道德;所謂「望重」,只表示聲望的輕重原來是與人格水平成反比。

佢講乜?其實有乜重要?早就不予理會!

我基本上好敬老,但有些人真的也是越老越墮落,越老越討厭!此君是樣板!

廣告

附加一句,嗰位「閹割Him」又係唔使恨,仲話要出面向曾俊華表明民賤聯(又名「假民主騙港聯盟」)唔會支持曾俊華參選特首。「閹割Him」喺1966澳門發生「12.3」暴動事件之後,有份過去澳門取經,想在香港搞番次同樣嘅時件,也確實在1967年造成六七暴動事件。佢哋已經逍遙法外半個世紀啦!

呢啲事,大家千祈唔好唔記得!

發表意見