立場新聞 Stand News

呢啲咪叫「歡場無真愛」囉

2016/11/29 — 13:07

「... 據知多名核心「梁粉」未有加入,包括行政會議成員羅范椒芬、新世界發展執董紀文鳳、前新聞處處長丘李賜恩三名女將,已決定不會在連任辦擔當職務。三大猛將拒再效勞,勢令梁營實力減弱,亦反映梁振英四年來未能覓得新支持者。」

《香港01》11月28日報道〈梁營啟動競選工程 三女將婉拒入連任辦

講真,喺咁嘅制度底下,加埋重要係梁振英呢個咁嘅人,埋得佢身,其實都係想搵着數啫。最簡單,睇吓嗰啲梁粉過去幾年嘅表現,就知道係乜嘢料啦。如果唔係,以佢哋呢班梁粉嘅質素,邊度有機會上靚位。到咗今時今日,睇到唔對路,正所謂「樹倒猢猻散」,「西瓜靠大邊」,保持距離、睇定形勢,揾過新碼頭好過啦。唔通真係信呢啲咁嘅梁粉忠君愛國咩?以前佢哋好多個都曾經向英女王宣誓,支持大英帝國,高唱「天佑吾皇」啦。對佢哋來講,只要係阿爺欽點,支持阿茂或者阿壽有咩唔同?唱國歌同唱卡拉OK其實又有咩分別?

唔好又比我估中,一旦正式宣布思歪不再尋求連任(即係北京再支持佢咁解),果班梁粉客氣啲嘅,最多都只係會扮吓嘢「表示惋惜,不過就理解及支持佢嘅決定」,或者會賣菜搭多條葱,表示「欣賞佢曾經作出過嘅努力」。然後轉身就走,兩不相干,一切關人。

廣告

其他如果要喺新一屆政府揾番個落腳位嘅,可能就會加多幾錢肉緊,批評一下你梁振英有啲咩不足,所以期望「新一任特首就要乜乜乜,又要物物物」。重要表現得好有遠見,好有承擔咁,如果唔係點出嚟搵食?

過去幾年,嗰班梁粉無論喺乜嘢場合,都會爭取任何機會向梁振英嘅潛在對手曾俊華背後放冷箭。如果一旦曾俊華真係有機會,你又睇吓呢班梁粉會點!如果到時個 deal 傾得掂嘅,隨時轉身幫曾俊華助選撐場又如何?我就絕對唔會感到意外嘞。

廣告

一句講晒,當所有政治倫理及程序公義原則都唔使再講,只需要服膺於權勢嘅話,本來就已經污糟邋遢、藏污納垢、爾虞我詐嘅政壇,就會進一步退化,明碼實價,有買有賣,一切都變成與權色交易冇分別,與政治文明也只會越走越遠,到時「政壇如歡場,歡場無真愛」才是唯一的標準。

發表意見