立場新聞 Stand News

「命運自主」堂

2015/3/9 — 11:12

9olitics 編按:兩位男神去完日內瓦講「命運自主」。其實9olitics都識講「命運自主」,不過我係無咁有台型啫(好似係)

咁又過左新年,除咗工要繼續返,都應該應節開吓年。咁我呢啲草民又唔係劉皇叔冇得幫香港求簽(丫話時話佢憑乜代香港人求簽?),惟有弱弱表達吓對香港新一年的祝願:祝香港可以「命運自主」!唉咁我都知冇乜可能,咁我哋夠知冇得中六合彩都照講「恭喜發財」啦。

不過「命運自主」其實係咩意思呢?「有得揀」係自主嘅基本條件,但點先叫「有得㨂」?我唔直接答你,我用例子答你。

廣告

假設你跌咗入個井,咁好彩個井入面有足夠嘅水同食物夠維生(唔好問我點解),但個井深到冇可能爬返上去,亦窄到咩都做唔到,最多可以郁吓手腳R痕咁。咁你得返R膊頭定R大脾揀,點叫有得揀? 咁咪「無自主」囉。

又假設你喺個森林入面,有隻老虎追住,你係咁走係咁避,行錯一步你就會畀佢捉住食咗。咁好明顯,雖然你有得揀向左跑定向右跑,但一揀錯你就會死。咁樣都好明顯係「冇得揀」。

廣告

再想像多一個例子:假設有份工話請你,但你唔要個offer你就要殺死另一個無辜嘅人。咁叫唔叫「有得揀」?喂,吓吓都要我殺人,點揀? *

即係話,要「命運自主」:1)唔可以得返啲「無關痛癢」嘅嘢揀;2)唔可以揀錯就死;3)唔可以要焗我做啲唔道德嘅嘢。

希望終有一日,香港會有一個真正可以「命運自主」嘅政治環境。


文:專寫政治哲學的C.L.

*呢幾個例子來自牛津著名法律哲學家Joseph Raz 嘅書,佢係當代政治哲學分構「自主」呢個概念嘅其中一個重要思想家。

原刊於作者 facebook

發表意見