立場新聞 Stand News

咪咁笨唔投票!

2016/8/30 — 10:40

作者製圖

作者製圖

筆者上個星期同一班金融業行家食飯, 話題由金融經濟講講吓又轉到即將舉行嘅立法會選舉。

筆者: 「你哋登記咗做選民嘅有冇收倒選舉通知書呀? 9月4號星期日記住去投票喎!」

行家A: 「投嚟做乜吖, 投邊個都一樣㗎啦! 政治嘅嘢關我哋做金融嘅鬼事咩! 最緊要背靠祖國, 繼續有錢揾!」

廣告

行家B:「嘩! 今屆啲名單多到咁, 都唔知邊個打邊個, 點揀呀?」

廣告

行家C:「投乜都冇用啦, 最後咪又係大陸話晒事...by the way, 投票係咪可以換走689先?」

行家D: 「我政治中立....香港太多政治爭拗嘞, 浪費時間! 我話最緊要係民生, 改善經濟同教育, 仲有老咗嘅退休保障呀!」

望住呢班金融才俊, 個個有車有樓有仔有女, 平時講股講經濟就大大聲, 但係一講政治就十分無奈。其實金融從業員同香港千千萬萬嘅打工仔一樣, 日日做十幾粒鐘都係為供樓交租養家, 政治呢樣嘢有時真係好似好遠。但係睇真啲, 其實我哋所有日常生活就係政治。何解呢?

政治其實唔只係投票選舉咁簡單。政治就係政府政策嘅源頭, 而每個政策都影響緊你同我每一個人日常關心嘅問題, 例如樓價、物價、税收、教育、醫療、交通、退休保障...真係瞓醒覺一開眼就要面對政治。我相信香港人大部份都很關心香港, 只係對政治現况有好大無力感, 但其實手中一票係有能力去帶嚟改變, 最低限度係一個公民權利去表態。

要記住, 你唔投票即係等同自我放棄權利, 任由會投票嘅選民去代你話事。無論你鍾唔鍾意都會「被代表」咗, 以後晌立法會通過嘅所有法案你無論支持或反對都係要接受, 而你嘅意見政府亦聽唔倒, 但係税就當然照交! 咁我哋又點會輕易容許陌生人替我哋話事呢?

而投票亦唔單止係投俾你最支持嗰位候選人, 亦可以係用票去阻止你最憎嘅候選人進入議會; 即係若果你個個候選人都唔鍾意, 咁就揀你比較支持或最唔憎嗰個, 減低你最憎嗰位候選人嘅當選機會。你唔投票, 但係其他人投, 你憎嘅候選人就更有機會當選。

筆者講完一大輪, 各位才俊好似略有所悟。

「我最憎嗰班擦鞋yes man政府話乜就乜, 等我揀個有啲主見㗎喇!」

「最緊要政綱有ABC, 夠簡單, 仲有唔好支持嗰啲冇用嘅千億工程!」

「後生仔需要多啲機會, 議會需要年輕新面孔去refresh一吓。」

大家七嘴八舌討論一番。筆者舉杯飲咗啖紅酒, 個心有小小安慰, 好似幫班才俊燃起咗希望之火。金融從業員雖然晌自己界別冇投票權, 但至少晌地區直選同超級區議會當中都有份投票。呢個公民權利冇理由輕易放棄, 係咪?

9月4號, 咪咁笨俾陌生人去代你話事, 記住身體力行去投票啦!

 

發表意見