立場新聞 Stand News

唔好再全副心機擺響選舉 全力勾結外國勢力

2018/11/29 — 15:49

朱凱廸唔肯妥協,值得一讚。

所謂「今日退五步,明日退十步,然後得『一席關鍵』。下屆選舉,則 DQ 又至矣!」反正條紅線係會不斷移動嘅,你一後退,佢條紅線又會再向前移兩分。再退多幾步,你就同大陸嗰啲八大黨派政治花瓶毫無分別(其實而家都已經冇乜分別)。而且而家條紅線仲識打橫,延伸至其他選舉添!問題關鍵在於,有機會贏嘅人,佢會用盡方法 DQ;而冇機會爭取到激進後生票嘅行屍走肉老屎忽,佢先當施捨下你俾你入閘,但入閘嘅代價會愈來愈大,令你愈來愈冇尊嚴,所以最後輸就固然唔駛講,就算贏都只係做到政治花瓶(咁當然,係有九萬八嘅政治花瓶)。一日唔能夠走出呢個困局,都唔會有生機。

所以唔該唔好再全副心機擺響選舉。九西補選一過,忽然又全世界睇實新東個位咁。根本自從有咗 DQ,選舉就已經係一個捕獸器,擺明來裝你嘅。咁我又唔係叫堆議員一下子總辭,完全放棄議會,而係要將重心擺響議會以外。諗下仲有咩嘢可以做。老共而家最怕邊個,又最怕乜嘢?有邊個可以威脅到佢?咁當然係美帝啦。咁點解唔改變思維,全力去勾結外國勢力呢?反正都一向被人當漢奸㗎喇,都唔爭在啦。組團周遊歐美,向西方世界大力唱衰香港(其實都只係講返實況啫),呼籲美國取消《香港關係法》,來威脅返老共吖嘛。而唔係好似梁家傑咁,早排仲去同鬼佬講「希望美國政府信守《香港關係法》的承諾,切勿對香港實施貿易制裁」喎,咁咪等如幫咗老共囉。而呢啲勾結外國勢力嘅事,係唔需要有議席都可以做嘅。你睇陳浩天咪最先將呢個議題擺上國際舞台,最初仲一大班黃絲插佢係鬼添,而家劉細良先後知後覺跟風話好。至於議會內班人,平日坐定定投票都做唔到,致謝動議又由佢通過甚至贊成,咁你仲講咩關唔關鍵吖,佢哋乖乖地開足會唔走票已經算執到啦。

廣告

至於勾結外國勢力之外仲有咩好做,咁就當然係認清事實,認清中國新殖民主義點樣透過大搞「中港融合」、「大灣區一小時生活圈」、每日 150 個單程證(一個配額可以賣到二百萬呀!)呢啲來溝淡港人,試圖將香港變西藏啦。你唔正視問題,唔代表問題就唔存在,明明見住新移民大本營德朗、啟晴幾次選舉大規模投俾保皇黨,都仍然視若無睹,轉頭仲繼續撐大灣區、撐中港融合,又支持無限制家庭團聚,好似民主黨胡志偉咁,之前仲去「大灣區」視察,撐中港經濟進一步融合,完全不知今夕何世,咁泛民進一步萎縮,就抵你死,唔好諉過於本土派啦唔該。

 

廣告

(標題為編輯所擬,原刊於作者 Facebook

發表意見