立場新聞 Stand News

唔好為spin而無視事實

2016/3/12 — 18:36

同一個畫面,唔同人用嚟批評自己唔滿意嘅人。兩邊唔該唔好為咗spin就響度捉住某一個畫面大造文章。

有啲人插泛民冇衝出去,有啲人問毓民響邊度。

首先,到陳鑑林違章宣佈舉手表決之前,已經有五個議員(陳偉業、陳志全、梁國雄、李卓人、毛孟靜)因為衝主席台被逐。

廣告

之後,會議移去立法會主場繼續,楊岳橋發言時被熄咪,於是佢攞大聲公出嚟發言,被陳鑑林宣佈逐出會議廳,仲在場嘅泛民去圍住楊岳橋唔俾保安夾佢走,黃毓民企上枱發言。

陳鑑林突然宣佈舉手表決,范國威、黃毓民、楊岳橋衝向主席台,但被保安截住。

廣告

簡單嚟講,有8個人衝擊過主席台(陳偉業、陳志全、梁國雄、李卓人、毛孟靜、范國威、黃毓民、楊岳橋),有泛民有毓民。

事實就係咁,唔好為咗spin就無視事實。

有人話如果梁天琦入到去就點點點,講到佢可以單天保至尊咁勁,成個建制派同幾十個保安都會怕咗佢咁。而家嘅氣氛咁絕望,香港唔少人會想見到去得更盡嘅議會抗爭,我諗9月佢有機會選到入去,佢可能會有更厲害嘅招數,唔知可唔以一個人撞開十幾個保安,跟住點樣唔會好似曾經衝過嘅8個人咁被逐或者被截。我諗9月之後可以驗證到究竟支持者們理想與現實是否相符。

(都係嗰句,留言批評我唔會介意,不過多數唔會回應)

發表意見