立場新聞 Stand News

唔好盲目指控佢哋係共諜

2019/1/24 — 15:06

港大候選學生會「蒼傲」

港大候選學生會「蒼傲」

我認為港大幹事會候選莊只係真心膠,信奉建制嘅乖乖仔,並唔係咩滲透咩染紅(當然而家應該有人向佢哋招手啦)。

佢哋完全唔識學生會文化同運作,可能當選中學學生會,對時事政治亦只有一知半解,所以面對質詢時答案模棱兩可,或者係迴避問題。例如佢哋根本唔清楚咩係公民抗命,政府用咩條例原因 DQ 同禁黨。以致佢哋回應質詢時,可以蒙混過關就混過去,無法迴避則付諸權威(香港政府),引用權威嘅答案。

面對佢哋嘅謬論,當然要直斥其非,但唔係盲目指控佢哋係共諜,否則只會將呢支莊同其他冷眼旁觀嘅學生愈趕愈遠,而唔係將佢哋拉過嚟。

廣告

如果係質詢嘅時候打爛沙盤問到篤,每一個細節問清楚。就例如係問咩係公民抗命,佢哋犯咗邊一條法,控方有咩原因證據用呢條罪,而唔係單單要佢哋就事情表態。相信佢哋已經潰不成軍,不得不當眾承認佢哋自己唔夠料,同埋立場係有問題,甚至知難而退。

 

廣告

(原刊作者 facebook,標題為編輯所擬)

發表意見