立場新聞 Stand News

單憑一個面具、一疊傳單,就可以界定一個人係本土派?

2015/6/15 — 13:22

TVB新聞今早報道一樁有關今晨亞視西貢舊廠檢爆炸品的新聞時,稿件內容有一句「警方消息指,拘捕了五男四女,屬於本土派人士。」(TVB新聞截圖)

TVB新聞今早報道一樁有關今晨亞視西貢舊廠檢爆炸品的新聞時,稿件內容有一句「警方消息指,拘捕了五男四女,屬於本土派人士。」(TVB新聞截圖)

【作者今午三時修訂內容,另加文章後半部份 (文末粗體示)】

我講緊邊篇報導,你明就明,唔明就算。

首先,據我理解,呢個宇宙只得一個權威可以界定某人某組織係咪本土派,嗰個叫陳雲。除非陳雲老師加入慈母行列,否則差佬所謂嘅本土派,全部係偽本土嚟。

第二,單憑一個面具、一疊「社民連」傳單,就可以界定一個人係本土派?我屋企有個Iron Man 頭盔,仲有幾隻Iron Man 同 Avengers 嘅DVD,唔通我就係Tony Stark咩?哈哈哈哈哈!

btw, 疊傳單-留意係一疊-係偽造嘅,並非社民連官方出品-被捕人士將會被告多條虛假文書罪(唔知係藏有再加使用兩條罪,定告藏有一條罪)。

第三,如果你明上述兩點,大佬呀!你點都放多本陳雲嘅城邦論落去做證物呀!屈又好、堅又好,無城邦論、遺民論,即係呢條友係偽本土派囉。

所以,單憑上述現有資料,我唔覺得爆炸品案同本土派無關,亦唔該唔好再亂安插代號。慈母做嘢,話要講求證據,無證無據,經唔起事實嘅考證,一係畀多啲公開資料,一係唔好亂講話同本土派有關,OK?重申多次,班友可能係本土派,但而家喺街嘅證據唔能夠說服我佢哋係本土派,得唔得?

第四,呢個好撚好笑。乜「V煞」面具都可以係證物?唐老鴨拍過有關納粹嘅卡通片,會唔會我遲啲畀人拉咗,佢show晒我嘅孖煙通話係犯法、等同支持港獨?(唯一可能係條友喺屋企畀人拉嗰陣戴住個面具;另,傳單可以用作虛假文書罪嘅證物)

第五,整炸彈,又如何?前兩日咪先有個乜嘢人,生前放土製菠蘿,之後得到乜嘢追封,死後風光大葬?呢啲殺人犯嘅名我唔想寫出嚟整污糟我個facebook。

第六,係咪差佬屈?哦,慈母咁有公信力,我梗係相信佢。早排咪話有幾條細路去集會嗰陣拎刀、拎武器,慈母叻叻豬捉咗佢哋,唔知佢哋而家去咗邊呢?

成班友都懞柒柒。你以為公開佢哋係本土派,就等同成功打壓佢哋?

一路以嚟,本土派成日畀人評擊為鍵盤戰士,講就凶狠,做就碌撚;自從幾鑊光復同退聯(我入佢哋數啦),啲人開始睇到佢哋有真正行動同一啲組織力。而家連武裝能力都有埋,你話會吸引到人嚟加入,定會令本土派嘅人流失?如果社會上繼續有咁多唔公平嘅制度、唔公義嘅事、無恥嘅人,你仲話畀人聽:

嗱,其實有人搞緊武力抗爭。

一旦知道有alternative route係武裝,而唔係喺網度齋打咀炮;相比現行文明、非暴力(或者畀人以暴力對待 cf 暗角打鑊)嘅方法完全唔可行,肯定推更多人向呢條路進發。

輿論梗係一面倒評擊啦。屌你,電子傳媒、報章一早歸晒邊,夠大撚把人話要袋住先,2017一定要得。問題係,而家出嚟社運、示威、光復班人做決定同評論係靠輿論嫁咩?

做人無PR,食屎;
做嘢無腦,咪有反效果囉。

犯罪學中,有個叫破窗效應(Broken Windows Theory),本身係講「環境中的不良現象如果被放任存在,就會誘使人們仿傚,甚至變本加厲」(維基百科)。應用到呢個情況,就係畀人發現「原來呢種武裝係存在喺呢個世界上」,一個小小嘅裂縫,減少咗作為創新、領導嘅邊際成本,不難想像好多人爭相效法。未搞光復,又有邊個覺得一簽多行變一周一行?

如果我係一哥,如果我想香港好(我知兩個如果同叫慈母道歉一樣都係天方夜談),嗱嗱臨出嚟澄清同本土派無關只係傳媒誤報,一切有待調查;再盡啲,咪使出二虎之計,話有人插贓嫁禍畀本土派,到時左膠同本土派又打一餐,政府咪嬴撚晒。

唉,香港由一班戇鳩嘅人去管治,就有咁嘅效果。

我真心愛香港呢個地方(何奇肉麻),但我已經無眼睇落去。

廣告

標題為編輯所擬;原刊於作者 facebook文章後半部份原址

廣告

發表意見