立場新聞 Stand News

回帶:要保議事規則,仲有張牌叫田少

2016/2/18 — 16:06

圖片來源:田北俊 facebook

圖片來源:田北俊 facebook

本土派同泛民日日開片就固然啦,但建制派又何嘗係鐵板一塊呢?我地諗野成日有個盲點,就係以為建制好團結,所以民建聯既周浩鼎一當選的話,建制就會立即夠票可以修改議事規則去阻止拉布啦。呢個可能性當然係存在既,但實際機會有幾高?好老實,我覺得唔係真係咁高。

而家泛民同保皇既直選議席比例係17對17。如果周浩鼎贏左,就係保皇18對泛民17。理論上,泛民就會喪失議員私人草案分組點票既否決權。先不論周浩鼎響餘下四個幾月的任期內排唔排得切佢個「修改議事規則」的私人草案,關鍵問題係,保皇黨係咪會全數支持「修改議事規則」先?

廣告

第一個變數當然就係立法會主席曾鈺成。如果要通過議案,曾鈺成就要辭去主席先可以投票。佢曾經講過唔會為修改議事規則而辭去主席,當然信不信由你。上個月,曾鈺成亦公開表示過,本屆立法會只剩下幾個月,若修改議事規則對下屆議會不是太公道。佢仲話,「有重大的修改要留下屆議會處理,而且基本法規定要首先處理政府的法案和議案,但其後補充是否提出,是議員的政治考慮。」可見佢表面上並唔支持修改議事規則,會因此而辭去主席位的機會其實唔大。

當然,有人會話,曾鈺成唔可信。我當然明。問題係,佢同梁振英都有好多牙齒印,其實佢冇咁大必要自我犧牲去幫狼英收拾爛攤子。

廣告

另一個變數就係田大少喇。我諗成個立法會入面,話唔定佢先係最憎梁振英既人。對於已失勢的建制派唐營而言,其實六八九政府愈亂愈好,立法會日日拉布,阻延梁振英施政,田少隨時係樂在其中添呀。而且早響2014年,田大少就已經響城市論壇上公開表示,反對修改議事規則,認為應從根本著手,「改善行政立法關係」。當然,呢啲係門面說話。但只要你代入佢角度諗就會明,作為一個邊緣的建制派,又好憎梁振英的情況下,何必要對泛民同拉布趕盡殺絕?立法會連布都冇得拉,主流建制一強獨大可以為所欲為之時,田大少呢類人仲邊可以從中渾水摸魚呢?所以站響佢角度,保住泛民的拉布權恰恰可以制衡一下呢個六八九政府同佢最憎既梁振英。

所以萬一周浩鼎入到議會想改議事規則時,田大少隨時會反高潮地再次倒戈,投反對一票,做香港立法會史上「第三次轉軑英雄」。而呢樣野,或者有利於佢地九月的立法會選舉。

當然,一定有人會話,你連曾鈺成、田大少呢啲建制派都好信既?佢地今日話反對修訂,聽日就可以搬龍門啦﹗其實都係架。從來唔係百份百保證架。不過同樣,如果你話「要靠18個泛民包括民主黨直選議員去齊心捍衛議事規則」時,我覺得機會其實差唔多囉。甚至乎,我寧願相信曾、田二人會基於建制內訌而保住議事規則遠多於相信曾經出賣過選民既果班民主黨囉﹗

 

(原刊於作者 facebook;作者撰文時,配用《蘋果日報》報道〈田北俊反修例阻拉布〉一文截圖。)

發表意見