立場新聞 Stand News

回應刪「國立」事件 劉江華繼續遊花園 稱無需制定工作指引

2016/5/18 — 18:12

民政事務局局長劉江華今日在立法會,再度被追問康文署要求劇團在場刊刪除「國立」字樣一事。他以過千字作回應,重申康文署應加強與藝團溝通,但認為無需要因此制定工作指引。人民力量陳偉業隨即炮轟劉江華在「遊花園」,其回應只是「垃圾一堆」。

立法會體育、演藝、文化及出版界議員馬逢國今日追問劉江華,有關「國立」事件的調查進展。劉江華的回應稱,民政事務局及康文署已檢視部門處理場刊的做法,發現不同組別人員,會因應節目有不一致的處理方法。他認為康文署可以加強與藝團之溝通,以「有商有量」的態度處理問題,避免再發生同類事件。但他稱民政事務局無需為此制定政策性工作指引。

人民力量陳偉業炮轟,劉江華的回答只是「垃圾一堆」,「完全無答,遊花園,遊完一輪三頁紙,垃圾!真係垃圾局長!」他再追問民政事務局有否要求康文署刪除「國立」字眼。

廣告

劉江華僅重申,製作由康文署同事及藝團作協作,但沒有直面回應陳偉業的問題:「基本上呢一類嘅製作呢,係康文署嘅專業嘅同事,同埋同藝團呢,有一個協作。」

劉江華在立法會的回應,節錄如下:

廣告

特區政府致力發展香港成為亞洲文化大都會,為配合呢一個目標,康樂及文化事務署每年舉辦本地,同埋來自世界各地嘅多元化,同埋高質素嘅文化藝術節目,以迎合市民不同嘅興趣同品味,使佢哋可以緊貼藝術嘅潮流,提高生活質素。

該署亦都積極支持本地不同規模嘅藝團同埋藝術家,為佢哋提供持續發展機會,同埋演出平台。每年舉辦嘅演藝節目,涵蓋音樂、戲劇、中國戲曲、舞蹈、跨媒體藝術等,不同嘅藝術範疇。

多年嚟康文署積極支持本地嘅藝術界,促進文化藝術嘅多元發展,同藝術呢、藝團呢合作無間嘅。喺舉辦不同嘅種類、形式嘅演藝節目時,署方同埋藝團呢,係保持緊密嘅溝通,在基於互信同埋互相尊重嘅原則下,策劃同協調演出嘅工作,使到節目順利舉行。

特區政府一向呢,係尊重藝術創作自由,根據一貫嘅合作模式,署方亦會協助藝團處理節目嘅場地、演出、票務,同埋宣傳推廣嘅事宜,以提供專業嘅支援。呢一種合作嘅模式,多年嚟行之有效,有助推動香港文化藝術嘅蓬勃發展。

對於馬(逢國)議員嘅問題,我有以下嘅回應:

馬議員嘅問題中提及嘅個案,主要涉及一個由康文署主辦嘅演出節目嘅場刊,編印嘅事宜。如上文所述,署方會協助合作藝團,處理節目嘅場地、演出、票務,同埋宣傳推廣嘅事宜,就編印節目場刊而言,場刊內嘅文字資料同埋圖片等,都係由合作藝團提供,署方不時會就場刊嘅資料嘅編輯、同埋印製事宜呢,係同藝團溝通,以提供專業嘅意見同埋支援嘅。

因應呢一個個案呢,民政事務局同康文署檢視咗部門處理場刊編印嘅做法,發現不同組別嘅人,或者啲人員,有時會因應節目嘅不同性質,同埋規模,有稍為不一致嘅處理方法。

具體嚟講,署方會因應不同演藝節目嘅性質,同埋規模,將項目交由轄下相關嘅辦事處,或者專業組別負責。有關人員會直接同藝團聯絡,同埋處理節目嘅場地、演出、票務、宣傳推廣,包括場刊嘅編製等等嘅事宜。由於過程中涉及多個工作環節同埋人員嘅參與,加上不同活動或者藝術範疇嘅節目嘅性質,同埋規模不盡相同,因此場刊亦都係各有特色,同埋風格嘅。

因應上述個案嘅處理方法同埋檢視結果,我哋認為康文署可以進一步加強,同合作藝團嘅溝通,雙方亦都應本著互信,更加深入咁了解彼此對場地、演出、宣傳推廣,同埋有關場刊編製等事宜嘅關注同觀點,以有商有量嘅態度呢,係處理問題,協力將演出做好嘅,避免再發生同類嘅事件。

由於每個節目嘅性質不同,加上屬於演藝專業範疇嘅工作,我哋認為同藝團嘅溝通工作,包括處理場刊編印嘅事宜,應該繼續由康文署專業職系嘅人員負責、協調、同安排,按實際嘅情況同藝團商議同解決問題。喺呢個大原則底下呢,民政事務局無需為此制定政策性嘅工作指引。

發表意見