人在中環 - CK

人在中環 - CK

我係一隻又笨又固執嘅豺狼。著有《人在中年》。

2019/7/16 - 13:33

壞人故然邪惡 但愚蠢其實更可怕

6 月 30 日撐警集會

6 月 30 日撐警集會

- 我其實一直都唔明,咩叫做「撐警」?差人只係執行當權者嘅order,有乜春要你撐?抑或號召啲人擺明去「撐當權者」講法太嘔心太核突,唯有借班差佬過橋?

- 有朋友話同情班差人。err…我嘅諗法係,我哋何德何能有資格去同情佢地呢?呢個世界有資格悲天憫人嘅人,都係屬於有upperhand嘅人。咁喺呢件事上面,觀乎雙方嘅作戰裝備,upperhand好明顯喺警察嗰邊啦。班差人或者有「資格」去同情班市民,but not the other way round。

- 朋友又話,唔係喎,班差人工作好辛苦,所以好同情佢地囉,仲要俾人鬧。我同朋友講,唉,係呀,好慘㗎真係。不過我喺有心情同情佢地之前,我其實同情咗你先。你工作都好辛苦呀,OT唔見得少過班差人,而你日日都要俾你條仆街老細同埋啲西客屌。慘就慘在,你仲要搵得唔夠人多,又冇宿舍。

廣告

-呢個香港需要被體諒嘅行業真係何其多呢?每個行業都有自己嘅屎要食,香港地個個都係咬緊牙關就挨過去。只有弱者先會大叫話自己份工好x慘要人撐㗎遮。你哋唔係一向都以硬漢子自居?我忽然諗起幾句歌詞:莫再悲,莫再傷,遇到悲哀休誇張。當然我明,係有人「要求」你哋要誇張一點的。

-每次有警民衝突,其間總會有啲前線成為「磨心」嘅文章、訊息流出。信唔信好?其實信唔信都冇意義,因為當總體前線嘅立場仍然係以痛擊示威者為中旨的話,所有呢類訊息都係冇意義。做磨心冇錯係痛苦,但像磨心同樣係你嘅選擇。假如我係你老細,我會好x狠心咁同你講,唔鍾意就唔x好撈,做磨心?你份糧包咗架仆街。假如到最後,你仍然選擇繼續做嘅話,大家可以點?良心有價,在份工同良心之間,你選擇咗前者,自然要承受結果吧,fair enough。

-警隊係被政府擺上檯。本來警民關係喺回歸前係非常和諧,讓警隊變成今日好似過街老鼠,連網上約炮溝女都唔敢表明職業,係政府一直出賣警隊嘅結果。政府、特首,將民眾對自己嘅怨氣,有目的地轉移去警隊身上,我覺得係徹頭徹尾嘅出賣。當日特首此地無銀話唔會出賣警隊,你地如果仲信的話,嘿。

-香港人打香港人,有啲人,總會睇得好開心的。

-壞人故然邪惡,但愚蠢其實更加可怕。

(原文無題,題為編輯所擬)