立場新聞 Stand News

大三罷,唔係靠叫出來

2019/11/6 — 17:45

8 月 1 日晚上,有年輕人在沙田新城市廣場請求市民參加 8 月 5 日大罷工。

8 月 1 日晚上,有年輕人在沙田新城市廣場請求市民參加 8 月 5 日大罷工。

【文:陳啟睿、陳旻羲】

各位,仲記唔記得呢啲句子呀?

「我地願意為你地擋子彈,你地可以罷工嗎?」

廣告

「放心罷,我們一起罷。」

運動去到呢個地步,每日有手足落街都俾popo濫捕、濫拉、濫暴,林鄭政府完全唔回應我地嘅六大訴求,雖然民意無逆轉,但現況好似停滯不前,我地仲有無嘢可以做??有! 我地仲有大絕,無限期三罷未出!呢一樣係不分和勇,每一個人都可以參與嘅行動。當然,唔好天真到以為真係好易做。無錯,三罷係效果係好大,但同時唔係齋叫就會成事 (以下會詳細分析)。但係,為咗嬴,為咗光復香港,你願唔願意同我地一齊罷???

廣告

點解運動去到呢個位需要三罷?

三罷,即係罷工、罷課、罷市,可以癱瘓香港日常的運作造成重大影響,並以香港最重要的金融同經濟要脅政府。試諗吓,如果世界第三大的金融中心的股市受到重大打擊,全球各國加諸喺中共同港府的壓力將會係前所未有之大,必然會逼迫佢地答應我地的六大訴求。而且,罷工罷課將會釋放出嚟大量人手去進行各類型嘅抗爭。簡單計吓數,一萬人唔返工,我當你十個人去擺個街站,宣傳我地嘅理念,去同街坊傾吓計,咁全香港每日就會同時有一千個街站!一千個喎,我擺埋入流浮山都得啦。最重要既係,三罷一旦事成,就勢不可擋﹕popo可以清場,但無辦法逼大家返工,呢刻嘅政權面對三罷,根本無計可施。睇返歷史,30年前東歐變天,推翻共產政權,當中大部分靠嘅就係三罷的力量。喺1988年嘅波蘭,由波蘭團結工會所帶領嘅全國總罷工就逼迫到政府同佢地進行談判,開始波蘭的民主化進程。

工會?咁即係要起大台?

喺呢個無大台嘅年代,當然唔會再有好似波蘭團結工會一個咁大嘅組織去籌備三罷。而且喺2019年,我地嘅工作環境已經愈來愈變得複雜,Freelance,零散工的存在亦令我地要做新嘅方法去發動罷工。雖然係咁,無大台唔代表唔可以有組織,唔代表要由得手足一個個人自己去打生打死。組織嘅好處唔單單止有助傳遞訊息,最強大嘅地方在於你會有信心,你會知道同事會罷,同行會罷,甚至老闆都支持你罷工。瑞典隆德大學政治學教授Johannes Lindvall指出單靠工人間的團結(Solidarity)或道德感召是不足以構成罷工的成功條件,罷工嘅成功率係同工會滲透率成正比。

講咁多,點先罷得成啫?

重中之重:罷工基金。三罷未發,糧草先行。搞罷工最令人卻步嘅一定係會令到自己無咗份工,所以罷工基金係搞成任何罷工的最根本前提。基金嘅用途可以有好多,有啲手足真係手停口停,亦有手足可能會因罷工而被人炒,罷工基金嘅出現都可以幫到佢地俾房租、醫療開支、水電煤、食物等等的開支,有咗呢樣嘢嘅承托,一定會有更多人一齊企出嚟罷工。另外,罷工基金亦可用於各種的法律及文宣開支。當然,基金最終嘅涵蓋範圍要由各位手足嘅工會自行決定啦。

第二,喺人手分工方面,外國嘅經濟性罷工通常會有以下幾項職業:

1. 律師團隊:處理一切法律糾紛、支援
2. 協調師:負責協調唔同部門之間嘅工作,為所有工會決定作最後把關
3. 封印師:負責拉起封鎖線包圍工作地點,令其他同事被罷工。
4. 文宣組:唔洗講啦
5. 聯絡小隊:專職做好對外對內聯絡工作,確保罷工內部資訊透明,流通。對外要確保罷工的形象一致,有需要時製作小冊子,擺街站做宣傳。
6. 會計師:負責睇住盤數,籌錢、管錢、批錢全部都要做曬,確保成個罷工跟足Budget進行。 

其中「封印師」一職,正正突顯三罷其實係和理不分,要兄弟一齊爬山嘅大招。問心個句,就算罷工基金有幾多,組織工作做得幾多,總會有香港豬豬係堅持要返工。呢個時候, 封印師就要企係最前線負責同啲傻豬豬對抗。 唔係話我地要郁手喎,而係根據而家呢個警察國家的生態,總係會有人報警叫popo嚟清場,甚至申請禁制令叫執達吏嚟趕走罷工手足,到時催淚煙四散,大家都唔駛返工。所以,做得封印師嘅手足係要預咗有一定風險,當中包括法律風險,而呢個亦都係點解大罷工係需要一個律師團隊的原因。

分好工之後,喺罷工正式開始之前,其實有幾樣野係要做好先,費時造成日後分化的源頭。第一,錢銀方面嘅嘢不嬲都係最麻煩,所以財務預算同守則一定要傾好先,用幾多錢,點用錢,錢點樣派比罷工嘅手足全部都係傾好先好罷工。第二,一定要做好組織工作,確實有幾多人,會用咩形式參與罷工,如果唔係,Freerider嘅出現,或者工會內部對其他手足的期望落差日後就會好麻煩。當然,以上嘅唔係金科玉律,喺罷工開始之後都可以改嘅,不過前提就係大家要一早com好點樣樣先可以修改囉。

上面講到有「唔同形式」嘅罷工,咁實際有幾多種呢?入門級:坐定定係度(Sit-down strike) , 手足可以每日定一段時間喺office乜都唔做,淨係坐喺度,拖慢成個部門、成間公司運作幾個鐘。進階級:Good-Work Strike,嘢就照做,錢就唔收,變相向個客免費提供服務,令到公司收皮,妥協。職業級:有一啲行業確實罷工係犯法嘅,例如公務員。但係,咁代唔代表大家唔可以一齊病?最近香港病咗,搞到大部分香港人都病埋,為咗唔好傳染比其他人,一個好公民梗係應該請病假啦!傳說級:唔請AL直接唔返。得一句咁少?係呀,就係一字咁淺。

講咗咁耐,咁而家我地可以做咩先?

首先,熟讀好以上嘅資料,同同事朋友屋企人宣傳罷工的必要性,幫手整文宣,貼連儂牆。然後,就係喺五湖四海搵同行手足一齊組工會,搞罷工基金(遲啲我地會出組工會認真懶人包),一齊Com好行內罷工共識,之後再同其他行業夾夾,實行全港大三罷......

係呀,講就好易,但其實上面我都講咗幾頁詳細可以點做。如果你睇到呢度,仲係覺得我可以做明燈,捉住你隻手一步一步教你做,咁你就錯啦。我地從來嘅定位只係想比啲好基本嘅知識,外國經驗比大家參考,但亦只限參考架。運動去到第四個月,香港人一路都係度創造歷史,我相信我地都係應該做嘅,創造我地自己嘅大三罷歷史。應承我,一齊搞三罷,一齊光復香港,好無? 

 

作者簡介:
陳啟睿是加州大學柏克萊分校政治科學博士生
陳旻羲是艾塞克斯大學政治理論碩士

發表意見