立場新聞 Stand News

「大佬孝」邵仲衡:1200人揀完畀我揀 我唔喜歡 亦唔接受

2015/5/21 — 19:34

《大時代》裡的「大佬孝」,談吐豪邁,快人快語,其實多少是邵仲衡的真本性。

邵仲衡平日經常滑手機,瀏覽Facebook,緊貼時事,不平則鳴,劉鳴煒萬五蚊買樓論,他忍不住教訓幾句,港視得不到牌,他抱不平,「絕對撐港視攞到個牌」。佔領運動爆發之後,邵仲衡和很多香港人一樣,親赴現場,「一個字形容晒:Remarkable。全世界都睇到真正香港人係點樣。」

最緊要有呢班人:有睇法,有良知

廣告

他樂觀地說,雨傘運動表面上爭取不到什麼,其實成果已結,「參與嘅人做嘅嘢,影響一路嘅進程,你唔通expect某君走出來話,我要廣納大家進言,我要真真正正攞本拍紙簿嚟聽你講,唔駛旨意。」

在佔領區,他見藍絲罵學生收錢,「誰是誰非,大家心知肚明,歷史咁耐以來,有邊單唔係真理必勝?納粹德國夠惡,最後戰犯同樣被問吊,秦始皇夠惡,最後統治中國幾多年?」

廣告

「最緊要,(香港)有呢班人,有知識,有睇法,有良知嘅人。呢班人嘅下一代,都係經佢哋教育出來。」對於香港未來,邵仲衡還是信心滿滿。

你見幾多貪官移民美國?

90年代初,邵仲衡一邊在娛樂圈拍劇拍電影,一邊做裝修設計、越野車等生意,輾轉北上從商。2008年因生意搬上大陸居住,邵仲衡了解的國情,與香港官員所說的不同,要和大陸打交道,邵仲衡認為,香港要知道平衡點,要懂得欣賞自己,不是一味點頭,一味追隨大陸。

「國內人好多都明白,要真真正正追求普世價值同知識,時間巨輪一直轉,停唔到,你估真係劣幣驅逐良幣,你見幾多貪官移民美國,唔見外國人移民大陸?」邵仲衡在大陸生活過,中國人、香港人兩個身份,他覺得無衝突,港人怕核心價值染紅,他另有看法,「香港背靠大陸有益處,但問題係點樣maintain good balance,呢個責任,喺政府身上。」

三個特首都不懂駕駛「香港」

「大陸點解要同香港搞乜乜通,物物通,大陸都好多高新科技區、發展區、保稅區免稅區,得唔得?上海自貿區得唔得?有無人投資入去,大家睇到。」北京需要香港,正是這一套賴以成功的制度,而這套制度的珍貴,邵仲衡認為,共產黨知道,他擔心的是香港政府的官員,自作聰明,自覺迎合,捫着良心辦事,結果將優勢敗掉。

97年之後的幾名特首,在邵仲衡眼中,正是不懂得香港的駕駛員,「香港係一架好靚、進化得好好嘅跑車,開頭嗰個有心,但技術可能唔係好好,咪撞花晒。跟住嗰個,成日顧住打好呢份工,諗住落車好唔好偷啲油走,第三個,只識得搬字過紙。但我哋架車仲行緊,因為我哋有個制度喺到。」

人在做,天在看,官員唔好捫着良心

「香港嘅公務員、問責官員真係要有良心,唔好嘅就唔好做。個天睇住,人在做,天在看,唔好捫着良心。人生有好多嘢,唔好因為份人工,你以為係高薪厚祿,個天隨時搶咗你,攞咗你個健康。你得罪人,做錯事,害咗人,始終有報應,到最終,You still have to pay!」

政府官員天天呼籲袋住先,邵仲衡明白中共想管住香港,但不代表香港人例牌配合接受,「千二人揀完,再畀我哋揀,我個人嚟講,我就唔喜歡,亦都唔接受,係揀就大家一齊揀。」他反問,否決了又如何,「咪放長雙眼睇,隨機應變,不用擔心,Nature will progress its own way in only one direction. 未來所有嘢只會變好。」

放手大陸生意

邵仲衡的敢言,除了因為緊張香港,也許是率性個性使然。2012年末,邵仲衡一覺醒來,不再留戀大陸生意,便全盤交給拍擋打理,返香港拍了港台劇集,還有去年的獨立電影《點對點》,啱啱撞着剛剛,《大時代》重播,工作機會接踵而來。

但他剔挑,演藝工作想要試新嘢,最近決定參與港產漫畫《火鳳燎原》的改編舞台劇,全因夠新穎、有新嘢。他覺得,香港電影亦然,要有新嘗試,不要固步自封,題材拍完又拍,也不要想着遷就大陸市場。

揀最好嘅嘢去做

「佢哋(大陸)之所以喜歡我哋個Product,覺得香港值錢馨香,就係因為係香港Style製作…《大時代》點解到而家在國內都咁收得,就係(大陸人)因為鍾意香港,無咗香港元素,點解仲睇你。」

「我而家會揀最好嘅嘢去做。一來要鍾意,二是我認為有興趣有市場嘅嘢。我比20年前,更加識得點樣去選擇。」

二十多年後的大佬孝,豁達自在,繼續我有我態度。

 

( 特別鳴謝 談風:vs:再說 提供訪問場地 )

發表意見