立場新聞 Stand News

好一幕屍殺列車

2019/7/22 — 2:29

圖片來源:無綫電視片版截圖

圖片來源:無綫電視片版截圖

我想,今晚好多人都瞓唔着!

我好想問吓,今晚住元朗嘅人,敢唔敢出街?唔好理你企哪邊,黃又好,藍又好,中立又好,不聞不問又好,你今晚,敢唔敢出街?

今晚唔敢,明天呢?以後呢?

廣告

當你一直以為,一切都係啲後生仔激進搞事,政治唔關我事,呢啲嘢點到我哋理,你一定冇諗過,香港會發生今日咁嘅事:

你只係一個好普通嘅市民,努力工作,因為市區樓太貴,你覺得邊關政府事,係自己唔夠努力啫,所以你好安樂咁喺元朗買咗樓。其實元朗都幾好吖,西鐵好方便,又多嘢食,又近郊外,真係可以話安居樂業。咁昨日星期日,你帶住老婆仔女,剛去完阿媽屋企食飯,然後搭西鐵返去自己嘅安樂窩。去到元朗,四圍都係白衫,你從來唔理呢啲嘢,仲心裏暗罵:「X,搞政治唔好搞到嚟元朗吖。」然後,因為你老婆成日想睇落瘦啲,着咗黑衫,跟住成班白衫嘅「人」衝過嚟鞭打你老婆,你老婆好驚,你以身擋格,但又要顧住哭成淚人嘅仔……

廣告

你做過乜?你只係想安份守己,安居樂業,你乜都冇做過,你認為關心政治係愚蠢的,最後,你成為無辜嘅受害者。呢個時候,你喺醫院陪住受傷嘅老婆,你應該諗吓,由六月至今,示威頻繁,好多示威者受傷,也有警員受傷,但一個無辜嘅市民都冇受傷,諗到呢度,你憤唔憤怒?

為什麼,今晚元朗比宵禁還恐怖?如果呢個政府、呢隊警隊,可以任由呢啲貨真價實嘅暴徒,隨意喺街肆意打人,我寧願你宣布宵禁戒嚴好過。

成件事,好有組織。今日有啲圍村朋友突然醒悟:唔怪得阿媽早兩日叫佢呢幾日唔好返元朗。睇那些打人嘅片,好多𡃁仔明顯係受過訓,躍躍欲試,佢哋等咗呢啲場面好耐,所以打得好狠好狠,女人照打,大肚嘅都照打,有細路喺身邊唔理照打。事後,一啲事都冇。呢個係你想要嘅社區?

其中一段片,係成班白衫暴徒,拉起已關嘅西鐵站鐵閘,衝晒入去。呢一幕,根本就同《屍殺列車》一樣。再睇入車廂打人嘅片,你真係無法相信,呢個係好多高官口口聲聲日講夜講嘅「法治社會」。

請黑社會做嘢,會令人驚嗎?林鄭成日想民意逆轉,依家真係逆轉了,痛恨呢個政權嘅,更加痛恨,本來唔關心唔了解嘅人,看見這一幕香港屍殺列車,也一定義憤無比,要聲討呢個政府和呢隊警隊,大家只會更加仇視佢哋。

兩年前,從來沒有想過,香港會被林鄭折磨摧毀至如此地步,她將會是香港歷史上最惡名昭彰的官員。這段血仇,這股民怨,這場風暴,不會簡簡單單在短時間「壽終正寢」,戰事很長,要修補香港的一切,已近乎不可能。無論如何,各位還關心香港還有良心的人,請團結一致,互相支援,守護下去。

發表意見