立場新聞 Stand News

如何具體促進「民主中國」

2015/6/4 — 14:03

【本土派質疑嘅係,支持「民主中國」的人,無一個好具體、進取的plan。而支持的人,係有責任提出建議(全文共三部分)】

如何具體促進「民主中國」? 

當然,好多「本土派」會反駁:你講咁多嘥氣:「一滴清水點解決一盤污水?」(當然呢個比喻係錯,如果香港vs中國,真係「一滴清水vs一盤污水」,咁當盤污水要搞你時,你粒清水都死梗啦,咁不如而家放棄算9數啦)

廣告

以上問題一直銬問著香港傳統支持「民主中國」的組織,呢個問題其實好有意義:佢唔單止質疑香港面對中國,影響力太渺少,佢更加背後係深刻地問:「你哋搞咗咁多年,係維園度唱「今天我」,無料到呀!你無新plan就算數啦!」

咁老實講,支持「民主中國」的人,又好似真係無一個好具體的plan,點樣可以更進取地達成「民主中國」喎。

廣告

所以,口講支持「民主中國」的人,為說服反對的人,你係有責任,講下你有咩行動同方法。

就此,我率先獻醜,諗下有咩行動,我哋係好易做到,希望提出之後,希望可刺激大家思考。大家提出更多方法。

第一,最重要,努力保護香港優勢,無講係政治、經濟、影視軟實力……確保香港對內地仍有重要性。確實如好多「本土仔」所言,如果有日香港都完,上面你都唔洗再諗了。

第二,香港要學習有組織地係大陸打網戰,研究點將真實資訊有效運返去。宣傳香港。 盡量有組織地確保大陸人可以收到香港民運的真實資訊。傳到內地。無論係實體自由行派單張,定網上宣傳。

第三,有組織地將香港的民運組織經驗、理論,有用的傳翻去,令內地組織可以學到。最好香港組織和內地組織之間,抗爭者和抗爭者之間,有更多互相學習及互動。係當中說明香港制度的優越性,保持香港的獨特同自主,如何有助大陸發展。 

第四,將大陸自身的民運訊息/政治新聞繼續發布,內銷大陸。呢方面香港的中國記者做得非常好!但普通人都可以有組織試下。

第五,了解下你的對手:中共!

唔好再講鄰國的事不關我事,呢個傾向係非常危險!「知己知彼,百戰百戰」,你連對手做緊咩都唔知,準備點對付香港又唔知,點抗爭?

所有支持香港民主的人都應該諗下,所謂支持一貫中國民主的人,更加應該諗更多創新的方法。

當然,誠如部份「本土仔」所言,香港人的確應該自量下,唔洗當自己救世主咁去「解放大陸」。但即使香港細,但香港人係今日「一國兩制」下,依然可以為「民主中國」發揮作用。

另外,亦不太妄自菲薄。你要諗下點解中共成日話香港「唔可以」做「顛覆基地」,佢說話嘅前設係,香港真係有呢個潛力做「顛覆基地」。過去,香港呢個品牌對大陸的影響力,係「可以」好大,唔係部分人想像中咁少。

早兩年,係內地的媒體當中,係不少報道中,都會將香港政策當成成功例子,同大陸比較。情況好似香港成日同新加坡比一樣。當然,而家中共要統一口徑,抹黑香港,就少咗好多了。仲有,以往香港的影視作品係大陸係好強,你見而家大陸周街都仲有「王傑」d歌播就知。

總結:

就係無論你係「本土」定「大中華」定「傳統社運」,基於「民主中國」有利「民主香港」,所以你都應該支持,甚至落手落腳去做。

但「本土派」真係勁憎中國,完全唔想理佢?其實正如陳雲都無否定香港同華夏、中國文化嘅關係。咩係「中國」,可以好彈性,中國歷朝都對「中國」的界定都不同。你亦不得不承認,香港同中國文化有一定關係。「中國文化」、「中國政府」、「中國人」、「香港人」其實都好彈性。

如果咁都仲係唔掂?咁你唔洗當自己係咩「建設民主中國」咁偉大,你當自己只係想令中共多添煩惱,係香港打鍵盤戰,為佢添煩添亂囉。

最後,某程度上,部分「傳統社運」都習慣避談「身份認同」問題,因為佢地會覺得一講「香港人」,好易變成排外民綷;一講「中國人」,就好易變成「民族主義」。但你要令對方接受一齊推動「民主中國」,你一定令佢情感上都唔反感。於是你難免要講下「身份認同」,發展一套又尊重香港自主,又會接受一定「中國文化」身份元素的身份認同理論,令有「本土」傾向的人在情感上都不反感,甚至接受。

 

 

文:19財籽@9olitics編輯隊

9olitics facebook9olitcs blog

發表意見