立場新聞 Stand News

如果我有機會即場問林鄭

2019/9/5 — 16:31

【文:匿名】

林鄭月娥女士:

1. 你提到撤回條例草案同你之前講嘅暫緩同埋壽終正寢係冇分別嘅,而你之前亦有提過而家嘅社會運動已經變咗質,再唔係要撤回條例草案咁簡單,咁邏輯上你點可能期望宜家撤回條例草案可以平息現時 200 萬上街市民嘅不滿,解決政府管治危機,並帶領香港走出困局呢?定係其實呢個只係你既定嘅劇本,瞄準九月開學季,當大部分年青人都需要顧及學業甚至面對來自家長、教師、社會等不斷加據嘅壓力下,作出嘅策略性攻擊,目的就係要趁佢病攞佢命,去瓦解青年嘅反對聲音呢?

廣告

2. 你之前有提過而家嘅運動已經變咗質,你認為係一班滋事分子甚至暴徒訴諸暴力去發洩對社會嘅不滿,其實民意已多次反映,你所講嘅變質,其實係廣大市民發動對現時社會不公義嘅抗爭,係警黑勾結、警察濫用暴力、捕風捉影呢一連串嘅行動,導致八條人命喪失、一千人被控暴動罪以致一千個家庭同埋佢地嘅朋友終日活喺惶恐之中,你話佢哋係暴徒,但事實係大家喺唔同嘅媒體同資訊來源都見到有手無寸鐵嘅市民只係向警察提問佢哋個良心去佐邊而俾警察追九條街扑爆頭,有被制服壓喺地上完全冇反抗能力嘅示威者被活生生咁扭斷手腕,而且唔止一次係多次,亦有市民搭搭吓地鐵被警方無差別式襲擊,莫講救護人員都需要賠上自己嘅眼睛影響一生。你不斷提到要嚴正執法壓止暴力,咁點解面對警方違法執行職務甚至濫用暴力嘅時候你完全避而不談、視若無睹甚至縱容呢?

3. 喺提到五大訴求嘅時候,你有表明某啲訴求係偏離法治精神嘅,例如特赦所有被捕者,呢個我相信社會都有唔同人士表示理解,但係講到設立獨立調查委員會呢個訴求,社會上無論係李國能大法官、法律界嘅資深人士、商界、醫護界、航空界、甚至政府公務員界別都認為係現時解開香港不公義之謎同困局嘅最合理甚至必要嘅方案,點解你仍然要堅持沿用監警會去處理呢啲對警方不信任嘅投訴呢?你多次提及監警會係既定合法同獨立嘅機構去處理呢啲投訴,而你亦都多次採用「審視」同埋「重組事實」呢個字眼去形容監警會將會涉及嘅工作範圍同埋行動,而避用「調查」、「展開聆訊」嘅字眼,而大家都知道監警會本身係冇調查權、召喚證人權、甚至整個過程係不公開嘅,你口口聲聲話想建立互信嘅基礎所以釋出善意撤回條例草案去回應社會訴求,但係點解唔可以行多一步,釋出善意之餘去切實回應市民係現時最關注嘅訴求,去為社會不公義嘅狀況作徹底嘅調查呢?須知道法治精神如你所講係香港的核心價值同埋作為國際城市嘅基石,你亦都多次提及希望可以為香港嘅深層次問題治本而唔只係治標,咁點解對住呢個「不公義」致命性問題同污名就堅決唔成立一個獨立調查委員會去還佢一個清白呢?

廣告

P.S. 最後一問:我唔敢出真名,因為我已經唔再相信香港有言論自由,呢個唔係我哋熟悉嘅香港,亦都唔係國際社會熟悉嘅香港,你作為行政長官、香港之母,會唔會可以幫我哋捍衛言論自由,讓我地免除活喺白色恐怖之中,還原返個真正屬於我嘅香港俾我哋啦呢?


 

發表意見