立場新聞 Stand News

「妖」言公關惑眾

2019/7/24 — 20:39

立法會議員朱凱廸、何君堯 7 月 23 日出席香港電台節目《視點 31》(香港電台影片截圖)

立法會議員朱凱廸、何君堯 7 月 23 日出席香港電台節目《視點 31》(香港電台影片截圖)

要數歷屆建制陣營最神憎死厭名人榜,何君堯呢幾日直衝榜首,悄悄威脅思歪嘅盟主位置。

但憎佢還憎佢,呢個有「鄉事派梁振英」之稱嘅所謂律師,比其他建制更有公關智慧。其言論雖令泛民同路人眼火爆,但卻同思歪一樣,準確掌握 Political Spin 嘅角度同火喉,深明中間偏藍嘅思路,佢喺黃絲眼中嘅瘋癲言行,喺藍絲世界卻係偉論壯舉。

噚日港台《視點 31》個辯論,明明矛頭直指佢同白衫人關係密切,有幕後黑手嫌疑,都俾佢 Spin 到個重心放喺「停火論」上面,迫朱凱廸呼籲大家叫停光復行動,等雙方都停一停。呢個雙方先停火減少暴力嘅講法,針對大眾恐懼暴力嘅潛意識,而忘記追究何君堯是否元朗暴力嘅關鍵人物,以至淡化自己喺 FB「君事行動」直播嘅暴力言論。

廣告

何君堯擅長打爛仔交,將中間選民啱聽嘅不停放大同重覆,要對付佢,就唔可以俾佢帶出個新議題逃走,要反覆追問佢同所認識嘅白衫人嘅關係,同抽曬佢係直播嘅言論出嚟,不停質問佢。佢喺「君事行動」較容易失言,因為多數自己友聽,加上講嗰時對住個手機自己噏,有時不自覺會講到上頭或過咗火,要利用呢啲言論去逐步重塑中間偏藍選民對佢嘅印象。

何君堯面對突發扑咪及群眾壓力,唔會好似蔣麗芸、王國興、鍾樹根等咁失控失禮,但又比正經到毫無神釆嘅李慧琼、范徐、梁愛詩有娛樂性及貼地得多。今日喺港台門口被人掟鞋,即時反應係話自己著八號半,叫人掟埋另外一隻。當年阿諾舒華辛力加競逐加州州長,喺出席集會時被人掟雞蛋,但瀟灑回應一句:「This guy owes me bacon now!」,一直被視為公關經典。何君堯雖然東施效顰,但對冇睇過呢啲國際政治人物精彩回應嘅淺藍人士,可能已覺得佢幽默睿智。

廣告

再到傍晚就家墳被毁回應記者,識得講會原諒搞事人,又再將件事 Spin 去愛香港嘅人唔會做呢啲嘢,永遠形塑自己係正氣凜然香港良心。選擇唔就呢單嘢發火,而用悲哀無奈之姿去取得最大同情,每一步都捉得好中,當然我指嘅係針對中間及藍絲市民嘅心態。

挖墳一事,現階段亦唔知道係乜嘢人做,但由於網絡出現不少嘲笑改圖,對家必 Spin 成係黃絲所為,喺公關上有蝕底嘅地方,尤其對傳統觀念重嘅華人,更會認為過咗火位。為免失分太多,要集中火力將焦點重新 Spin 向何家祖墳涉非法霸佔官地呢點,以帶出鄉紳特權呢個中間選民會生厭嘅角度。

要對抗建制嘅智慧型無賴,取笑佢輕鬆一下無可口非,但都要同佢鬥智互 Spin,不能掉以輕心。

 

作者 Facebook

發表意見