立場新聞 Stand News

學民不表態 不影響你的決定

2016/2/19 — 0:34

新界東補選候選人

新界東補選候選人

【文:李宗澤 學民思潮成員】

「成員不能同時成為其他政黨黨員,以保持組織獨立性。」呢個係學民思潮會章其中一條,而且都係由創立到今日嘅傳統黎,因為大家都知道對政黨係要保持一定嘅距離,正正會保持距離會選擇加入學民。

今日學民思潮有篇聲明表明唔會支持任何候選人都係一個好平常嘅事情,如果你對學民有任何嘅幻想會表態支持,唔好意思組織真係唔會咁做,因為組織個個人都有唔同嘅諗法,唔可以就一個表態就可以代表所有人到底大部份人係咪支持某個候選人 ? 單單撐楊岳橋同梁天琦已經係可以傾左成晚,訓醒幾百個msg,有人有幫楊岳橋助選,都有人走左去做本土富士康,所以絕對難以有一個表態。學民係一個好奇怪嘅組織,因為大家走埋一齊係因為一個議題,而唔係因為某個政治光譜,學民嘅成員政治光譜唔係單單左右就可以講到,係有左右不是人嘅人,要勇武時係有人去勇武,要和理非又有人係和理非,你問有無人勇武 ? 咁我條非法集結係咩黎 ? (又show社運CV ?)有人曾經講笑咁講,如果本土派係第三勢力,學民肯定係第四勢力,因為同建制敵對,而泛民/泛左、本土都唔係完全地合作,當然有部份嘅議題都可以睇到合作嘅空間,要合作其實唔難,睇大家點夾姐,有心夾嘅都夾到架啦。

廣告

你可能對學民無表態係失望,甚至係無期望,但都唔好因為學民表唔表態去影響左自己嘅決定。民主投票不嬲都係靠自己嘅獨立思考去決定架啦,真係諗唔到嘅就睇下2個人有咩好處而去決定。

兩者都唔應該喺到互相叫大家去含淚,大家叫大家含都唔會點大改變,而係說服下一D無意欲投票嘅人去投票,明明新東仲有幾十萬人無去投票,倒不如發掘下呢D無投票嘅選民返黎多票過周浩鼎仲好過啦。

廣告

發表意見