立場新聞 Stand News

寫在特首選舉前

2017/3/24 — 20:50

3月24日晚上,曾俊華出席愛丁堡廣場造勢大會。

3月24日晚上,曾俊華出席愛丁堡廣場造勢大會。

【文:我是公關仔】

有些問題始終諗極唔明。

下午lunch time薯片係公司樓下集氣大會,當然都要落去湊下熱鬧。全條太古坊擠滿市民大叫「曾俊華加油!」,其實真係幾感動。香港真係好多年無咁嘅政治和諧氣氛,即使當日選立法會時,楊岳橋叫多人鍾意啦掛,岳少出嚟造勢時,對面街都會有條友大叫「x街收皮啦!」。而今日薯片叔嘅歡呼聲可以響徹太古坊,真係有種莫明奇妙嘅感動。

廣告

不過,係咪「敵人嘅敵人」就係朋友?大家唔鍾意林鄭,支持薯片就理所當然?當然薯片嘅公關係做得好,加上政治大環境,民望高就好似眾望所歸,公關仔甚至見到有條友舉住支旗仔寫「民主之父」,即時嚇一跳。香港人係咪餓咗政治和諧太耐,有個人以less evil嘅姿態出嚟就乜都好?無疑,薯片叔叔當選嘅話,同泛民磨合嘅政治蜜月期無疑會長啲(如果係林鄭就直情無蜜月期而係批鬥期添啦),社會上和諧嘅氣氛或者施政應該比今屆政府好啲,起碼大家都客客氣氣,唔會咩都動刀動槍罷明唔妥先。(嗱,建制派點做係唔駛諗嘅,因為阿爺過到佢地就轉軚,如果阿爺俾薯片上,到時佢班人又走出嚟話支持特首,所以提嚟都無謂)。

然當大家沉醉於呢班好似中央同港人自主之戰時,薯片叔叔的勝動就如港人贏了一仗,請不要忘記,who always agree with his boss。當有朝一日阿爺做咗薯片嘅boss,一個高民望、識得用公關嚟洗底洗腦駛橫手嘅人,其實比全城皆憎,個個會防備嘅人企出嚟施政,更恐怖。故此,成也民望敗也民望嘅話,今日唔係話唔支持薯片叔叔,但眼見呢啲支持變得盲目過火,請想想,他日回望,你會後悔今天所做的盲撐嗎?

廣告

當然,你肯睇到呢度都可能已經鬧爆,因為依家三個爛橙係度,焗住揀嘅時候,揀個無咁爛嘅橙係理所當然的事。

我明白,亦同意。

然公關仔不明白嘅地方,係咁多泛民投開口票支持曾生,因為政治就係妥協,那當初我們為什麼要反對831框架上街、反對廿三條立法,支持雨傘運動呢?回想當日我吸的那幾口催淚氣、晚晚尾班車返屋企,甚至瞓街爭取普選的意義何在?只不過為抵抗西環,就要妥協,放下我們曾經義無反顧堅持的信念嗎?明明薯片叔叔的政網即使重啟政改但仍以831為基礎的呀!難道公關、和諧、民意與反對敵人,就可以推翻這些曾經我們堅持並為此可奮不顧身,甚至原意灑熱血、賠上前途的東西嗎?

近日看到好些人責怪羅冠聰、朱凱迪等要投白票的舉動,感慨他們為什麼不加入泛民加量,集腋成裘地阻擋西環治港。有時候,我都會覺得他們的做法可能真的不夠團結,但回心一想,更應欣賞他們的堅持。這些看來不夠大體不夠合作不夠團結的動作,其實才真真正正的堅持我們最初的信念。我不知道他們的做法是戇居戇直,是對還是錯,然我仍然衷心的敬重他們的堅持,按著最初的理念而行。今時今日,香港最難得的不就是這些毋忘初衷的核心價值嗎?

此時此刻,我心裡也希望薯片叔叔甚或胡官能在此場選戰裡獲勝,因為林鄭的確太乞人憎。但無疑我心中仍有好些疑問耿耿於懷。或許大家覺得我呃like,明明過去幾個星期就一齊讚賞薯片而鬧爆林鄭,然毫無疑問薯片叔叔的公關戰術與他的形象真的值得讚賞。但站在過度膨漲的公關形象宣傳前,不妨退後一步,想想其實我們要的是什麼。

事到如今,困惑依然。唯衷心的寄望,若薯片叔叔真的是眾望所歸的那位, 曾俊華先生,請記著今天香港人給你的感動和溫暖,好好記著守著並實行你的承諾,千萬不要走數。

請不要讓香港人從失望走上絕望之路。

 

作者自我簡介:公關仔,份工返日頭唔係返夜晚,但往往都係今日返工聽日先收工。作者Facebook專頁

 

發表意見