立場新聞 Stand News

寫給前度情人的信

2016/5/19 — 15:50

圖片來源:社民連 facebook

圖片來源:社民連 facebook

【文:鄺頌晴(滑鼠娘娘)】

Ex: 

我今日打開電視,又見到你响獅子山上面向我示愛。其實,我真係同你再冇可能了。

廣告

冇錯,我哋曾經開心過。嗰79日入面,我真係覺得你真心想同我行落去。但當時,你當我都知道,我俾個衰人挾持住。當時你每一日都大嗌住你要我,你為咗我瞓街,所有人都知道你有幾想同我一齊。

有其他人替你不值,明明我哋就應該一齊,於是佢哋決定幫你,佢哋想向個衰人郁手,想搶我返嚟。但你竟然阻止佢哋,話咁樣會令其他人更加唔支持我哋嘅愛情。我好失望,原來我唔係你口中講得咁重要,原來你講就好聽,都真係要你付出嚟帶我走,你就放棄... 你對我嘅追求,都只係得個講字。

廣告

79日之後,你連反抗都無試過,就任由我俾人帶走。前一晚甚至開Party慶祝,成地閃粉咁,到底你愛唔愛我呢?

本身我都諗住,算啦,都過咗去,由得佢啦。你有幾愛我,大家都有眼見。但到咗今日我發現,原來你唔係愛我,你只係愛「愛我」嗰個形象,你鍾意嘅係你大情聖嘅形象。 

於是你唔肯放過我。已經一年了,你仲係周圍同人講你好鍾意我,好想同我一齊。但係呢,當時可以搶我返嚟,又唔做,眼白白睇住我俾人帶走。個陣你話You Will Be Back,我真係相信你,但原來你嘅Come Back只係繼續講,完全唔係想搶我返嚟。 

我覺得好醜,曾經對你有過希望。我只係覺得俾你利用咗,用來成就你大情聖嘅形象。你根本就唔係想得到我,你只係想做大家眼中嘅情聖。

當我求下你,唔好再消費我啦好嘛,我哋完咗架喇。一年前,你親手送走咗我,就唔好扮情聖,唔好扮苦戀。唔好再做埋啲冇用無聊嘢想繼續扮好掛住我。你上山示愛,個衰人都唔會放我走,係想要就要同佢死過、同佢搶。

你係想補償嘅,就好好地對香港,好好珍惜佢,唔好再因為要扮情聖而負咗佢。 

前度。真普選上

P.S. 寫嘢示愛就唔該啲字寫好啲,或者用電腦印啦好嘛。

P.P.S 你放過我啦,完啦好嘛?

作者facebook

發表意見