立場新聞 Stand News

寫給10年後的契仔

2016/4/11 — 10:15

【作者按:以下係四日前電台約我寫嘅一封香港家書。不過後來取消咗錄音,原因我唔打算講嘞。 現在原文登出,主要係想我契仔真係收到呢封信......】

軒軒:

當你收到呢封信嘅時候,你應該係21歲,好快就大學畢業,而契爺如果仲喺度,就已經70歲,離開咗教育嘅崗位啱啱10年,係一個真正嘅老人。

廣告

喺呢10年裡面,冇人知道香港會發生乜嘢事、會變得更好抑或更壞。但係如果你仲記得嘅話,喺10年前,當時香港嘅特首叫做梁振英。喺佢嘅管治下,雖然未至於民不聊生,但係就真係民怨沸騰。政府幾乎每一項措施,都以發展為名,消耗或者輸送利益為實,更甚嘅,係有好多為咗配合中央對香港同香港人嘅自由、自主逐漸收緊而夾硬推行嘅政策,結果激起咗年輕一代嘅抗爭運動。我相信你一定記得,喺你剛剛滿9歲嗰年,香港就發生咗一場從未試過咁大規模嘅雨傘運動,歷時足足79日。我記得喺嗰段漫長嘅佔據日子裡面,有一個氣氛好緊張、好詭異嘅深夜,我喺接近我學校嘅公路上,守住前面嘅雨傘廣場。我攞咗部手機出嚟,睇住一段你用牧童笛吹奏小調嘅短片,然後寫咗一段咁嘅文字比你。我話:

「軒軒,呢幾日,我一直掛住你。我想話畀你聽,好多好多哥哥姐姐正喺度用佢地嘅血、力氣同智慧,為你争取一個美好嘅將來。契爺都喺度幫手。有時,契爺攰嘞,就會攞呢條片出嚟睇,或者畀朋友睇。每次,佢地都會話: 嘩,咁大個啦?佢地好多都係睇住你大嘅。佢地讚你,契爺都會好驕傲。今晚,出面嗰班邪惡嘅壊人,將好多哥哥姐姐都打到受傷。我但願呢個世界真係有一個你好鍾意嘅 Iron Man,可以我幫我地打低嗰個可惡嘅特首。契爺有啲攰,所以又將短片睇咗一次,但係個畫面就越嚟越模糊...」

廣告

雨傘運動嘅結束,帶畀香港人好大嘅挫折感,政府變得越嚟越囂張,警權不斷擴大。2015年年底,喺毫無預示嘅情況下,突然出現咗一部用5部、而每部大約長20分鐘嘅短片組成嘅電影,最初佢喺一間小型戲院近乎無聲無息咁上映。5部短片嘅導演都好後生,古仔都唔一樣,但係都有同一個主題,就係想像香港喺10年之後——亦即係話你而家身處嘅香港——會變成點樣。有人拍政府自編自導咗一場政治暗殺,作為佢通過國安法嘅藉口;有人拍保育,最後連個主角都要將自己變成埋標本。有一段拍廣東話已經逐漸畀普通話取締。有一段拍一個年輕嘅抗爭者死喺監獄裡面,同時就有人為咗抗爭而選擇自焚。最後一段講政府成立咗少年軍,周圍收集違抗政府命令嘅「犯罪」證據。部電影用咗好少錢拍,但係估唔到觀眾反應好好,一開始就場場滿座,由一間戲院到六間,然後所有戲院又突然都唔肯再安排畀佢上映。佢喺唔同嘅院校、社區搞放映,放一場滿一場,結果連香港電影金像獎最佳電影都攞埋。套電影,就叫《十年》。

你應該記得,契爺有放過呢部電影畀你睇。睇完後你問咗好多問題,我盡量嘗試解釋畀你聽。你問我電影裡面講嘅嘢會唔會真係發生。我話嗰幾個導演哥哥想講嘅,其實就係提醒我地,要我地諗下,如果我地唔想嗰啲嘢發生,我地應該點樣做。你好似有啲明,但係又有啲唔明。而家,就輪到契爺問番你,十年後嘅香港到底變成點?中國到底變成點?世界到底變成點?你自由嗎?有冇好似我而家認識嘅好多年輕人咁,你從佢地嘅手上,接替咗佢地嘅棒,繼續反抗呢個不公不義嘅政權?定抑或,你選擇咗離開呢個城市,做一個移民?

無論答案係邊個,有一樣嘢係最重要嘅:就係你自己,先至係唯一可以自由咁選擇你覺得最適合你、最能夠滿足你自己嘅追求嘅答案。換句話講,即係你先至係決定自己命運嘅人。喺你過去10年,我肯定上面講過嗰班哥哥姐姐,好多都冇放棄到,而且係用咗唔同嘅方法,包括通過合法嘅選舉、通過教育同文化藝術、甚至有可能通過激烈嘅武裝襲擊,為香港、為香港人、為佢地自己、亦都為你抗爭。呢啲做法,肯定會喺唔同程度影響住你嘅成長、你嘅思想。但係唔好忘記嘅,係你作出你未來10年嘅選擇嘅時候,你對比你年輕10年嘅下一代都有一份無可推卸嘅責任。我唔相信10年後嘅你面對緊嘅社會,可以完全擺脫或者推翻呢個腐朽嘅政權,但係只要你有上面我所講嘅一代傳一代嘅意識,惡魔係終於會有倒下嘅一日的。

我希望你記住《十年》呢套戲,同走喺你10年前嘅哥哥姐姐,然後勇敢咁踏上你10年後要走嘅路。嗰陣時,就算契爺再唔喺度,契爺都會好放心…

祝你擁有屬於你嘅幸福,

契爺,舒琪。
2016年4月9號。

發表意見