立場新聞 Stand News

【專訪】陳澤滔:毒 L 同你做個好榜樣

2016/9/14 — 20:07

陳澤滔

陳澤滔

陳澤滔仲記得,上年佢喺區議會選舉輸 99 票。係 exac7ly 99。

之後佢喺 facebook 寫咗個 post,咁講:

廣告

有個網民咁 reply:

廣告

陳澤滔打完呢句說話,就係咁喊,係咁喊:「呢個社會仲要年青人犧牲幾多嘢先夠。」

大佬,時間又俾咗,錢又射咗落海啦,仲想點呢。唔好一開口就生活?食風呀?

嗰時陳澤滔無諗過選立法會。好喇,終於都係選,又輸埋。講真,其實為乜呢。

 

五日前,我去到牛頭角地鐵站,見到有個高高瘦瘦嘅男仔企喺度篤手機。嗰時天黑,個男仔皮膚又黑,保護色下我幾乎認唔到佢係邊個。望咗幾秒鐘先知原來係陳澤滔。

嗰晚係陳澤滔最後一晚謝票。

謝票團有二三十人左右。本來係陳澤滔助選團隊,選完之後自稱「落選團隊」。有時開大聲公,第一句會係:「大家好,我哋係陳澤滔嘅落選團隊。」街坊經過聽到會揞住嘴笑。

睇陳澤滔謝票好騎呢,因為你會見到佢好似打 Warcraft 隻 hero 咁,俾人點來點去。「你,企呢度,對住馬路嗰邊嗌咪!」助選團會咁樣同佢落柯打,跟住佢就會鵪鶉咁照做。

當日謝票嘅總指揮係一個叫做 Kristine 嘅女仔。矮矮細細,長頭髮,睇落好似弱不禁風咁,但統率力應該高過陳澤滔。通常個謝票流程是咁的:

陳澤滔先開聲嗌咪:「喂喂?(試咪)大家好,我係東九龍社區關注組。多謝大家嘅支持,雖然我哋輸咗,但係唔會就咁就放棄。我哋係東九龍社區關注組,多謝大家。」

跟住 Kristine 就會好熱血咁嗌:「一,二,三!」然後大家一齊鞠躬:「多謝各位街坊支持陳澤滔,我哋會繼續努力,請支持東九龍社區關注組,多謝!」

右手邊就係 Kristine

右手邊就係 Kristine

有一幕係陳澤滔喺間佳寶前面嗌完,跟住突然間爆咗句:「大家以為我哋同佳寶有咩關係,其實無㗎,我哋係經過㗎咋,哈哈哈。」嗰時個咪仲係開住的。仲有,每逢有細路經過,佢都會停口唔嗌,然後扮米奇老鼠同個細路講嘢。個細路反應通常都係 O 晒嘴。我希望今日啲細路聽過米奇老鼠點講嘢。

總之,老老實實,呢團謝票團似大學 O Camp 多過專業政黨。陳澤滔頂多係個大組長,點睇都唔似政治人才。

唔只係我啦,Kristine 都係咁諗。呢位細細粒指揮官講嘢好直接。我問佢點睇陳澤滔,佢話覺得陳澤滔唔係好識 present 自己。比如陳澤滔開咪,Kristine 要提醒佢企中間(因為佢成日企埋一邊),眼望前面(佢成日望地下),唔好郁身郁勢(佢成日兩隻手吊吊揈),同埋唔好講咁長,要精簡。佢成日講嘢長過長洲。

除咗 present 之外,仲有一個問題係,陳澤滔好鬼介意人哋 hi 佢。無論係區議會定立法會選舉,佢一路嘅「選舉策略」係唔家訪、唔告急、唔打電話叫人投票。咁做係因為佢怕乞人憎。有時候,網上面人哋話佢一句,佢就要放喺心入面好似洗衣機咁攪來攪去,攪來攪去,搞到自己苦瓜乾咁面口。所以大家都叫佢做港女滔。

其實呢個年代,唔好玩啦,正如古語有云,出得來行,預咗要還。上得網,你就預咗俾人左邊一片右邊一插,何況係搞政治?德蘭修女都會俾人插大愛離地啦。

陳澤滔咁講:「咁人哋批評得梗有原因嘛,佢哋批得我啱,我咪改進,唔啱我咪澄清囉。」

之但係好多係鳩插㗎嘛。

「其實大部份意見,你好難判斷係誤會定鳩插。咁咪嘗試返了解件事囉。所以我成日出澄清 Post 㗎,哈哈哈。」

今屆選舉,多咗好多人 add 陳澤滔 facebook。咁大鑊啦,意見仲多。佢連想學 TVB 搞個選後 BBQ 都有人會同佢講話,喂,下個禮拜落雨喎。跟住陳澤滔就困擾。係喎,落雨喎,點算好呢。義工同佢講,唉一個半個意見,你唔好理啦。陳澤滔話,唔係喎,人哋咁講可能係啱㗎喎。

扭扭擰擰。

「我知我無論外表同性格都唔似係適合從政。又怕醜、講嘢又唔夠直接、唔夠肯定,好多人都話我唔夠成熟,俾唔到信心人。」陳澤滔咁講。

偏偏一次又一次行出來嗰個就係佢。陳澤滔,點解.你要.咁樣做?

 

陳澤滔 1984 年出世。佢未嚟到呢個世界,老豆就先過咗身。攞綜緩嘅陳媽媽一個人湊大陳澤滔同佢兩個家姐。佢算係讀得書,中學讀聖言。聖言係間男校,學生出名純品但高登仔特多,原因不明。陳澤滔話可能係傳統。我諗來諗去都唔明點解一間學校傳統可以係多高登仔。總之佢話,如果喺高登開個聖言 post,會特別多回覆,最少佢個年代係咁,依家唔知。

依家應該都差唔多,聖言早排先搞過「愛國歌曲歌唱比賽」 ,如果大家仲記得。

呢間學校就係佢成為毒 L 嘅起點。嗰時佢嘅最大興趣就係同同學打機。Warcraft、Starcraft、Winning…...幾乎只玩 multiplayer game,貪一齊打先過癮。

機打得多唔代表唔讀書,陳澤滔 AL 考 2A1B,兩個 A 係 Pure 同 Applied。雖然數學好,但佢唔想齋計數,又唔想讀純理科,所以 JUPAS 揀中大 Computer Engineering。

佢嗰一屆有四十幾個男仔,得三個女仔;下屆,零個女仔。我都係中大出身,而且同陳澤滔同年畢業,所以知道我哋個年代,大家印象中 Engine 仔有幾毒。陳澤滔話,佢 exac7ly 就係咁嘅人。

又係聖言傳統。唔知點解好多聖言仔讀中大都住新亞知行樓。嗰時陳澤滔住知行,成條 Wing 六間房都係聖言。喺宿舍,一日到黑打機,瞓覺。走堂走得勁過建制派走數,一個 sem 返得幾堂。

07 年,Third hon 畢業。陳澤滔話佢自己抵死。跟住走去做電訊,寫 program。你去外國嗰時咪會收到訊息話打長途電話幾錢優惠嘅,陳澤滔搞嘅就係嗰啲。

寫落,先知原來自己唔鐘意,因為覺得好似無乜意義。電訊商會發達,但無人會開心咗。陳澤滔係毒,但係毒得來佢唔係淨係想對住部電腦過世。

佢其實想人開心。打機為乜?都係大家開心之嘛。

所以當佢去完澳洲 working holiday 返嚟,2010 年搵到迪迪尼份工,陳澤滔先算真係搵到自己嘅至愛。佢主要工作係做維修工程。如話國師落雷劈爛咗部過山車,換零件,調整返個 software 嗰個就係佢。有時候佢亦會做更新,例如喺 space mountain 度加啲焦焦焦嘅元素。雖然只係 Engine 嘢,唔係設計嗰啲,但只要見到人玩完,笑住咁樣路過,陳澤滔就已經覺得好滿足。係,迪迪尼係搵錢,但起碼做啲嘢出來大家會開心。佢真係好鐘意見到人開心,所以佢唔介意做一世迪迪尼。

「嗰時仲想去大陸山區教書......覺得好似幫到人。咁依家梗係唔會拎返出嚟講。本土派鬧鬼我呀嘛,哈哈。」

好似佢呢種人,正常嚟講其實真係唔會搞政治。都係穩穩定定,結婚買樓。陳澤滔自己都話,佢開初其實真係唔識政治,以前學生會搞抗爭,佢仲會覺得班人熱血過頭。

之所以會開始睇社會嘢,最初都係因為 newsgroup。今日後生仔應該唔知咩係 newsgroup。佢類似於討論區,但比討論區更加舊式。如果唔係陳澤滔講,我都唔知原來仲有人用。佢話 newsgroup 最大好處係個樣睇落似 e-mail,喺課室或者 office 睇都唔會太揚,唔會話好似高登咁,一睇就知你吞 pop。

咁陳澤滔上個 newsgroup 叫做 twonil,易俾玲。一睇就知個谷平時係講波(唔好同我講你唔知點解),但係個谷啲人一熟,有時都會講吓社會政治,陳澤滔跟 post 跟得多,咪都會關注吓。

至於令陳澤滔真係覺得想行出來,係因為 5 年前一單嘢。如果大家仲記得,人力喺七一遊行後曾經同差佬衝突,仲出埋椒。事後包括毓民、阿牛、慢必在內嘅 138 人被的返差館。陳澤滔嗰時無參與,但係有睇直播。佢問自己,點解呢班人要行出來俾人拉呢?佢哋都唔係傻㗎嘛,咁都肯做,為乜?

當然嗰時佢諗乜係唔會有人 care。如果陳澤滔嘅社運生涯係一個 baby,2011 年嘅佢不過係一粒精子。佢真正出世,係 3 年後。2014 年七一預演佔中嗰次,輪到佢俾人拉,變成 511 個被捕人士之一。跟住佢寫咗篇叫做《511 分之 1》嘅文章,講返自己經歷。就係咁,佢紅咗。

好多人喺篇文度回應。你知陳澤滔性格,每個留言佢都一定會好細心睇。睇完佢明白一件事,就係篇文之所以廣傳,唔係因為佢寫到好似畢加索咁有文采,而係因為篇文俾到人一個訊息,就係每個人都要行前一步,其他人先可以跟住行落去。

就好似遊行,如果永遠都係得一條友企前面帶,其他人全部淨係跟,咁遊行永遠就只會係遊行,行完咪散水。但如果隊伍入面,有一個人肯問自己,我係咪都可以行前啲呢?咁呢場遊行就有可能發展落去。

眾所鳩知,超人只係卡通片,呢個世界係無超人。正因為咁,打怪獸先唔係話次次要邊個出馬,而係要,一人一步。如果人人都問自己係咪可以再向前行,西環都可以俾你踩到陸沉。

「我想講嘅係我同大家無唔同,我唔係英雄亦都唔希望做英雄。今日留喺度嘅係我,我希望他朝留喺度嘅係大家。」《511 分之 1》入面,陳澤滔以呢一句說話作結。直至今日呢個 moment,佢諗緊嘅都只係一件事,就係呢條毒 L 要做個好榜樣,令更多香港人知道,自己都可以行出來。

陳澤滔

陳澤滔

所以,陳澤滔向前行一步。舊年佢同廿零個素未謀面嘅高登仔,一齊搞咗個東九龍社區關注組。上年選區議會,今年選立法會。最好梗係贏,輸晒,其實都無緊要,因為好多人真係因為陳澤滔,行多左一步。你睇今年個義工團構成就會明白:有啲人係佢聖言時代嘅同學,有啲係 engine 嘅大學同學,仲有啲係 twonil 嘅版友。當年佢有個師兄,依家讀緊博士,今次選舉同佢坐低貼 label。又有個舊同學,平時 facebook 少講政治,為咗佢,竟然寫咗兩篇千字文,講陳澤滔呢個人有乜料到。

仲有阿富。好多人應該唔知邊個係阿富,但係關心陳澤滔選戰嘅人都應該見過波波。波波就係阿富隻貓。facebook 好多佢嘅相。隻貓其實有啲似陳澤滔嘅,因為正如正常 engine 人唔會走出嚟參選,正常嘅貓都唔會俾主人帶出街露面;但係陳澤滔參選,波波露面。阿富話,波波係三年前佢朋友喺一個粉嶺廢車場執返來。帶佢睇醫生,醫生話佢性格外向唔驚人,所以阿富帶佢出來做義工。如果有最佳義工獎,應該頒比波波,須知香港貓奴多,波波應該幫陳澤滔吸咗票。君不見謝票嗰晚搵隻貓傾偈嘅人就多過搵陳澤滔。又唔可以怪人嘅,我都摸咗好多嘢。

唔好意思,講返阿富。佢同陳澤滔相識於雨傘,因為被陳澤滔行出嚟嘅理念感動,所以幫佢手。依家阿富係東九龍社區關注組三四十個 core 其中一員。上年區議會佢助選,最尾輸咗,馬尿流足一個禮拜。今年再幫。33 歲人,有份正職,正職以外時間全部用來助選,終於有日起身,隻腳痛到落唔到床。醫生話佢過勞,膝頭軟組織發炎。揸住拐仗都仲要出來開街站。我同佢講,好心你就抖吓啦。阿富話,時間唔等人。同埋,佢相信陳澤滔,相信佢真心。

阿富同波波

阿富同波波

好多人幫陳澤滔助選,都係因為真心難求。細細粒指揮官 Kristine 直頭唔介意同我講,佢其實無好認真睇陳澤滔政綱,港獨立場嗰啲梗係知,但 Kristine 真正睇重嘅,係陳澤滔個人。佢記得嘅係陳澤滔會擺完街站開完會,攰到趴喺度都要同義工一齊做選舉富士康,摺通郵。又有一次,Kristine 同另一個義工喺麗晶花園擺街站,突然有個阿叔好激動咁衝埋嚟,Kristine 以為個阿叔挑機,咪著草。著唔到,個阿叔捉住佢哋係咁講係咁講,Kristine 先知原來佢係支持者嚟嘅。陳澤滔唔知咁多,遠處望見唔知個阿叔咩來路,一心諗住衝過去保護義工。保護就唔需要啦,但係呢一幕,就印咗喺 Kristine 個心入面。令佢相信為陳澤滔呢個人,值得一星期五日朝朝五點幾起身擺早站,擺到身水身汗返工,收工後再擺晚站擺到十一二點。

陳澤滔就係咁嘅人。有點港女,有點毒,有點真心。(所以佢仲有個名叫真心滔)呢種人你唔會想像佢四圍 hi 人,所以佢講來講去咪就係唔打負分戰。陳澤滔會屌票,簡直係同朱凱迪會炒樓,梁天琦認西環做契爺一樣咁唔 make sense。

當然你同我都知道,做契仔可以獲配票,炒樓先可以發達。比例代表制要點玩,陳澤滔唔係唔識。「你喺政治光譜度劃一塊地,然後屌走晒塊地其他候選人,你咪贏。」但佢性格不合,唔玩。

之前三跑佢去機場示威,主辦單位同支持者叫佢講兩句,陳澤滔死都唔肯,即使佢明知選舉須要曝光率。佢話自己無做過嘢,唔應該講。

傻的嗎。

「違背良心嘅嘢好少做,所以咪輸囉,哈哈。」

 

落選團隊最後謝票嗰晚,有啲街坊行過會停低,同陳澤滔講兩句。其中一個哥哥姓簡,住牛頭角上村。佢話因為欣賞陳澤滔唔玩污糟手段,所以投佢一票。咁最尾選唔到,無計啦。佢停低係想問陳澤滔,之後有乜打算。

「我應該退唔到落嚟㗎啦。」陳澤滔同簡生講。

好似好勉強咁。其實無錯,真係勉強。選舉來講,佢係烈士。上年區選,佢已經將留返來同女朋友買樓嘅首期,射咗一忽落海。本來佢無諗住話選立法會,但係青年新政搵佢,諗諗吓,好啦,射多忽。依家選舉條數未計得清,但應該十幾萬走唔甩。佢同佢女朋友依家住緊劏房。我直接問佢,其實你覺唔覺得欠咗人。佢話,梗係覺啦。

如果可以,陳澤滔最想係正正常常返迪迪尼,唔好再搵佢,因為佢真係唔適合從政。只係,同關注組嘅人傾完,始終都係暫時未退得落嚟。不過又灰唔晒,佢喺義工團入面都搵到人有 potential。如果有人企出來,佢就可以退居幕後。

「我呢兩年嘗試做嘅,其實都係說服更多人企出嚟咋嘛。唔好等英雄,等人幫,自己香港自己救,我相信係做到嘅。」

希望下屆選舉,我哋唔會再需要見到陳澤滔個樣,喺張候選名單上面啦。

陳澤滔

陳澤滔

發表意見