立場新聞 Stand News

尊重事實,找出真相,獨立調查,抽出黑手

2019/8/8 — 22:45

6 月 21 日示威者包圍警察總部期間,警察總部外牆被投擲大量雞蛋。

6 月 21 日示威者包圍警察總部期間,警察總部外牆被投擲大量雞蛋。

如果真係懷疑有幕後黑手在培訓勇武的示威人士,挑動與警察的暴力對抗,就更加要作出全面的獨立調查。

香港人唔係傻仔,唔係一個張曉明講一句有幕後黑手,或者葉國謙之流話一句有個訓練基地在某個離島,香港人就個個都蠢到好似啲嘍囉五毛、愛黨盲毛咁當係真,或者明知係假都講到似層層。如果葉國謙都知,點解政府及咁威武、咁有效率、咁世界一流嘅香港警隊仲唔去冚檔?葉劉淑儀、葉國謙這些人,都是行政會議成員,講嘢使唔使負責?如此嚴重的指控,使唔使提出證據?

香港人見到嘅係乜?就係啲警隊高層日日出嚟做埋啲爛騷,攞啲所謂證物雷射槍離開易燃油墨上照射,去證明咁就叫係攻擊性武器。呢一類小學雞行為,究竟係侮辱緊邊個嘅智慧?只係不斷說明香港啲警察越嚟越低 B!建議警察即刻邀請葉國謙攞料,然後去離島冚了那個秘密訓練基地;也建議葉國謙主動與警方合作,知情不報等同包庇。如果係亂噏,就盡快收聲,唔好以為香港人係傻仔!

廣告

依家正經嘢就唔做。搵幾個黑警跟蹤一個學生,然後趁佢買咗幾支雷射電筒,包裝都未拆,就話係攻擊性武器,擺明屈得就屈。仲要做埋啲咁嘅爛劇,擘大眼在傳媒鏡頭面前對住全香港市民講大話!如果係咁,我建議下次如果有人再搞不合作運動,唔好去搞搭車返工嘅市民,不如搵幾百人每人攞起美工較剪或者美術?刀,去警署投案,自報有攻擊性武器,仲要順手告發隔離左右十戶都有,睇吓警察到時點做!

中共最叻就係貼政治標籤,唔需要講證據,唔需要講客觀事實!日日話有幕後黑手,日日話有外國勢力操縱,但係從來提不出證據!而家就連特區政府都學埋呢啲咁嘅下三流招數。話你係反中亂港,就係反中亂港;但係從來只係得政府咁講,從來都唔需要證明。

廣告

如果話搞亂香港,把香港拖向危險的深淵,這個人是誰?這個人其實就是林鄭月娥及那幾位主導着成個《逃犯條例》修訂的問責官員。有律師出來證明 6 月 12 日早上七、八點,已經有示威者被拉被失蹤。這一個事實說明了 6 月 12 日下午在立法會及金鐘一帶,無區別全方位濫用警察武力、大範圍施放催淚彈這個做法,也是整個政府陰謀的一部份。目的就係要盡快令立法會繼續開會,通過修訂草案。這是整個抗爭運動走向暴力的觸發點。當天衝擊警察防線的只是在立法會門外的少數人,但警方的暴力卻遍及整個金鐘,除立法會門外及政府總部之外,由中信大廈一路去到統一中心、金鐘廊及太古廣場一帶。 我當天在場觀察,我當天已經說,當時最暴力的暴徒其實就是警察。

那是一個關鍵的轉折點,然後港人憤怒了,出現了 6 月 16 日二百萬人的遊行。

另一個轉折點,是 6 月 30 日的那個撐警大會,除了一批愛黨盲毛式的藍絲之外,還是第一次有江湖人物走出來支持政府。那天也是第一次出現以「針對人為目標的暴力」,他們吐口水、撥泥、圍攻記者、打議員、搗毀展示物,全部都有贓有證有片有錄音!暴力施政是政府造成,在抗爭中帶入暴力顕然也是親政府的、支持政府的那些力量開始的。

7 月 1 日衝擊立法會確實很有問題,這一種以暴易暴的方式不可取,但起碼他們不是以傷人為目的,而是對政權暴力的回應。我贊成要作深入調查、要追究。但同樣也贊成要對引起這種暴力回應的政權暴力、警察暴力、及江湖藍絲暴力追究到底。這才算是公平合理!

事件拖延的主要原因是政府不肯正式撤回那個草案。當獨立調查已經成為社會上最大的共識及公約數的時候,政府仍然以千般不成理由的理由拒絕。警監會的業績有目共睹,有行政暴力在先,有警察暴力在後,再有藍絲江湖暴力跟尾,你叫香港人及那些被警察濫打濫捕的人去相信警監會?

往後這幾個星期的事態就更加不用多說了。示威者的暴力回應在提升,警察的暴力就更是變本加厲。而且把不守紀律、不跟循警例、不出示委任證、亂放催淚彈、警棍亂揮、以後續暴力對待被制服了的示威者,這一類違紀違法行為視作理所當然。違法達義就得唔,違法執法係咪冇問題?

也很想知道 7 月 21 日元朗恐怖襲擊的幕後黑手是誰,最好幫香港人查清楚。現在有不少人說幕後黑手就是中聯辦、香港警隊。也有不少人認為是官黑勾結。而家仲有傳言話區區都有黑幫,或者所謂「愛國的正義力量」,已經被中聯辦動員,政府及警方又會全力配合佢哋以更龐大的暴力去「止暴制亂」,香港人究竟會信邊個?

點解中聯辦、港澳辦話抗爭活動是陰謀,又有幕後黑手,又話有外國勢力,但來來去只得譚耀宗、葉國謙、梁美芬呢類人、再加埋那些盲毛藍絲才會信?廣大市民就是不信。年輕人就更加不信。點解話警黑勾結、中聯辦亂港,又有咁多人信?

唔好求其搵一個在香港市民心目中完全冇公信力嘅京官,靠把口講一句就以為可以說服香港人。更不可能以為官員放個標籤,大家就一定唔信唔得。

大家要繼續堅持尋找真相。大家要知道誰是這一次反送中亂局的罪魁禍首,大家要搞清楚那些官員需要問責,大家要知道警暴及江湖暴力的幕後黑手是誰,大家也要知道是不是真的有幕後黑手及外國勢力在搞亂香港。唔好得個講字,全面的獨立調查最實際,最能夠令香港人服氣!

香港是一個理性的社會,擺事實、講道理、講證據、講程序,才能服人。還是那一句,如果行得正、企得正,怕乜全面的獨立調查?支持政府透過獨立調查證明我及很多其他香港人諗得太多而且講錯。請用理性和事實說服香港人!除此之外,還有其他方法嗎?

 

作者 Facebook

發表意見