立場新聞 Stand News

對唔住,我決定改投白票

2017/3/26 — 9:24

資料圖片:陳澤滔

資料圖片:陳澤滔

去到呢一刻,其實我知我投乜都影響唔到結果,但我都嘗試交代下我會投乜。

一個星期前我諗嘅係含淚投JT,甚至已經寫好道歉文,希望大家明白我嘅選擇;但呢一個星期嘅新聞,一次又一次令我質疑自己嘅選擇,JT 話所有支持佢嘅人都同中共唔係企對立面,JT 出聲明話佢反佔中同譴責旺角事件,JT 話佢嘅競選活動係龍和道嘅新意義。

呢一票愈嚟愈重,亦都愈嚟愈違心。

廣告

最後係某啲IT Vision 其他選委pm 我,叫我唔好做一個自己會後悔嘅選擇。

我想同香港人特別係依然覺得要企硬講,甚至係喺龍和道失望過灰心過嘅人講:其實民主派又好、民主300+ 又好,無人忘記過你哋。300+ 入面有好多人對JT 不滿,但無奈佢哋要整污糟自己嘅手去為JT 背書,為嘅係唔希望林鄭當選。

廣告

我希望憤怒嘅香港人可以保持你哋對制度嘅憤怒,特別係年輕人,喺雨傘革命行過出嚟嘅一群,唔好對300+ 有怨恨,亦唔好覺得俾人忽視。下次,我哋喺呢個唔知幾時會改嘅制度,一齊打啲新位返嚟,去贏文化界、區議會,去同全香港人講我哋對香港民主嘅願景。

另外我特別對IT Vision 嘅成員,IT 界嘅選民講句對唔住。IT vision 好包容我去做我自己嘅事,對唔住,我揀咗另一個選擇;而更唔好意思嘅係IT 選民,因為我用咗你哋果票去代表一班根本可能連選委都無資格選嘅人。

對唔住。

我唔會再選IT界。如果要再選嘅,下次我會憑自己實力打啲新嘅界別返嚟。

發表意見