立場新聞 Stand News

對雷動嘅批評邏輯上有bug

2016/9/17 — 15:54

9月4日立法會選舉,太古城票站是香港其中一個人龍最長的票站。晚上十時半截龍後,不少排隊選民均拿著智能手機查看選情,部份向傳媒表示,投票意向受雷動計劃影響。

9月4日立法會選舉,太古城票站是香港其中一個人龍最長的票站。晚上十時半截龍後,不少排隊選民均拿著智能手機查看選情,部份向傳媒表示,投票意向受雷動計劃影響。

【文:Cursor】

利申:我選擇咗響應做救兵。

最近聽到好多人出嚟批評雷動,當中有中方報章,有建制派,有泛民,有本土,有落選候選人,有當選議員,幾乎整個政治光譜都有政治人物出嚟鬧,選舉整體嚟講係個零和遊戲,有候選人因雷動失利,照計總會有候選人得利,點解冇人出嚟撐雷動呢?可能因為大家計算過撐一個自稱負資產嘅人冇咩着數,但係佢哋或者唔記得,今次係有好多選民支持雷動,而我哋係有自由意志嘅人,選擇咗去以我哋贊同嘅大局作為主要考慮而投票。今次選舉令我好感動,因為二百萬人出嚟投票,有市民投票到半夜兩點半。但係我都對好多候選人好失望,因為佢哋唔會同我哋稔大局,只顧住自己會唔會冇咗份工,一於寧攬炒莫被炒。

廣告

個bug喺邊?唔同黨派議員拉票,好多朋友出嚟同自己支持嘅候選人拉票,即使我哋唔支持某啲朋友所拉票嘅候選人,我哋都唔會覺得有咩問題。即係話,如果我支持泛民,我唔會去鬧建制派出嚟拉票,就算我唔贊成一啲拉票嘅理據,因為每個人應該有權利同自由去支持任何候選人,同埋你有你拉,我有我投,冇人迫我投邊個就得囉。呢啲先叫真選舉。

雷動計劃都係一樣咁拉票啫,有咩問題?我哋響應雷動做策略投票都係因為同計劃嘅理念一致或接近,我哋相信根據數據嚟考慮大局再決定投票,我哋明白數據有偏差,我哋明白有risk會令到某啲OK嘅候選人落選,我哋明白當中有啲人為嘅決定去揀邊個係Private Ryan。最後如果雷動提議我去救一個我唔可能支持嘅Ryan,Sorry,蛇咬我都唔會跟住投,理佢係雷動定雷神。

廣告

有朋友去幫一啲候選人拉票,有人本著相同理念去投所支持嘅候選人,冇問題,好正常吖。雷動本著以數據考慮大局嘅理念去拉票,我哋去支持做策略投票,做救兵,有咩分別?有咩問題?雷動拉票嘅分別可能係:今次雷動有太多人支持,影響比預期大。咁唔通多人參與就有問題?咁唔係表示個理念多人支持咩,即係有市埸。

前幾次選舉,除咗功能組別外,差唔多我投親邊個嗰個都輸成條街,張票等於掉咗落鹹水海,最後個選舉結果都唔係我想見到嘅局面。今次用雷動,我張票至少發揮到少少作用,而最後啲局面總算比我預期好。其實雷動都係第一次出街,等於startup做MVP (Minimum Viable Product),總需要推出去market實地test吓,今次出嚟嘅result都唔太差吖,我都覺得個計劃有好多改善空間,例如有啲難用同都唔易明,咁係MVP嘛,我相信下次可以做得更好。

選舉期間,我一直冇表態支持任何候選人,因為唔想同人拗。選舉過後,我願意冒住被人插,表態支持一個負資產計劃,因為我覺得雷動係work嘅。


P.S. Technically, Votsonar is a strategy to solve the Prisoner's Dilemma. See also Wikipedia on Prisoner's dilemma.
 

發表意見