立場新聞 Stand News

小修小補難緩和局勢

2016/3/21 — 9:59

特首梁振英 (TVB新聞截圖)

特首梁振英 (TVB新聞截圖)

北京兩會結束後,經過頻繁的政治互動,各種渠道傳達出來的訊息,是中央未就689連任扑槌,「旺角暴動」場戲變成梁振英一人獨腳演出,大家背後都笑到膊頭震震吓。中央急促為「港獨分離主義暴力行動」降溫,當然知道中咗伏,原來係警民衝突,類似內地無日無之城管打小販及公安執法引致群眾事件。如果真係如起初定性,涉及國家安全,以習近平作風,佢親自抓國家安全委員會,點會為咗九月立法會民建聯上落一兩個直選議席,而置原則問題不顧。有人借「旺角暴動」想敲山震虎,起初的而且確達到目的,但問題是當涉所謂國家安全,自然會派人來港作調研,一如當日派出國信辦主任魯煒到金鐘佔領區收風一樣,如果當日「旺角暴動」真是港獨分離主義策動,梁當然平暴有功,但若果是警民衝突,那就是另一回事了。

自張德江、李克強一直到港澳辦副主任馮巍、劉兆佳等口徑一致,不單冇再提分離主義暴亂,甚至進一步表態,認為即使幾個激進青年當選,又有甚麼大不了?兩會之後,林鄭立即變成和平鴿,約泛民議員商討調動財委會議程,以減少拉布。同之前網路23條寸步不退判若兩人,林鄭自發表官到無求宣言後,一直處處針對泛民,比689還要勇猛,絕不會無端轉軚,背後一定是來自北京的政策指示。

「旺角事變」之後至今形勢變化,不少評論認為是九月立法會選舉前北京權宜之計,因戰略需要而扮溫和,以免政局再進一步對立,激進勢力高漲,共產黨真正防範並非泛民,因大家打交道多年,對方招數了如指掌。但本土派及激進學生,猶如打開了Pandora Box,起初相信幕後操盤者有人還樂觀其成對付泛民和理非,但到𠵱家個勢越來越大,才知問題大了!

廣告

問題是泛民今非昔比,香港政局激進化,不能靠小修小補可以解決。由於689管治及用人路線經已確立,你林鄭呢頭做親善大使,另一邊李國章之流是Loose Cannon,永遠失控,喜歡鬥嘴寸人,出任港大校委會主席,即係畀咗個炮台本土派學生,由現在到九月,有佢加持,本土派學生競選工程,真係冇得輸。仲有其他準備九月出選非泛民勢力,包括學民仔之新政黨、朱凱迪、傘運人士,唔少已經Campaign當中。而梁粉系局長如陳茂波、吳克儉之流本身民望已經低殘兼乞人憎,本身又冇政治水平,必定被圍攻。吳到新界西出席學校活動被包圍,醜態盡現,而嘉湖山莊非法卸泥事件,由於政府部門反應出奇遲鈍,陳茂波繼續慢吞吞打官腔回應,個個新西候選人都撲晒出來,又係死得。還有未計專辣㷫自己友的另一個「波哥」。梁系人馬毫無走回溫和路線迹象。

經過689幾年來為對家造勢,如今所有本來和理非黨派也終於「被勇武起來」,公民黨本土化,下一個將是民主黨,𠵱家猶如周星馳電影中比塊膠布貼住一個子彈貫穿的傷口,得啖笑兼且無用。唯今之計,提早明示中央決定下屆換人,先可止止咳。

廣告

原刊蘋果日報

發表意見