立場新聞 Stand News

屯門良景 警黑合作 不能不理 今日再會!

2016/2/10 — 15:02

PHOTO CREDITS TO 不知名記者,當時有記者影到,但又俾現場朋友影低。所以最終張相出埋街,都未有人知係邊個媒體既。

PHOTO CREDITS TO 不知名記者,當時有記者影到,但又俾現場朋友影低。所以最終張相出埋街,都未有人知係邊個媒體既。

【文:Echo Yun 屯門居民】

昨晚基本上係警方自己養出黎既惡果,大家睇新聞會以為良景係今日先搞成咁。而其實呢幾日良景都係咁,8/2年初一都有發生過打鬥,但結果都係冇拉到人。個陣班黑社會同今晚唔同啊,唔係係建築物入邊,而係係一個圓既細凹地度,當晚警察仲任由黑社會挑釁巿民,一條鐵馬分隔「城管」同巿民,警方係企高位拎CAM拍片,仲要係只對巿民唔對「城管」。有人俾人打,最終都係車走左傷者,而冇拉到任何「城管」。

警方自己驚黑社會,對住小巿民同埋黑社會時,以取易不取難既態度去解決,每次都係搵個位困位班「城管」然後唔俾巿民衝入去,冇流血就當冇事,有流血都係唔留證據。今日「城管」打人都係咁嫁,警方只搵幾個同僚入去睇,大多警力係反而用係出邊擋住巿民。如果你係有心捉,咁撚多警察有咩理由捉唔到人!

廣告

搞到良景每一晚都係民黑衝突→警方介入分隔→警方擔心巿民衝,面對巿民、背對「城管」→變相保護「城管」→出事都因為CAM唔對「城管」,冇證據拉唔入→等巿民走→警方默默收隊→5點左右「城管」收工,自行散水。

當每晚「城管」打人,一堆警察只顧擋巿民,都唔拉人。我去左兩晚,一晚開路俾「城管」運物資,一晚就配合佢地放Break帶佢地出黎買野食。我係好撚心寒。

廣告

今日,警察拉封鎖線,已經趕哂所有巿民去對面馬路。我同朋友見住警察扮行出黎,兩個黑衣男尾隨係封鎖線度行出黎,警察同黑衣男保持一定距離咁穿過人群,而個兩個黑衣男正正就係琴晚圈內既「城管」(對唔住,我係一個女仔,拎住部手機,除非追住否則真係好難影到)。過左10-15分鐘,人地就拎住M記番黎,仲若無其事咁入番封鎖線。即係乜野?即係人地話要買野食,班警係完全唔驚「城管」突然打人,有哂協議同默契咁帶佢地行出黎。

警察同「城管」建立信任關係,係應份嗎?合理嗎?

好撚荒謬,但係係真既。係啊,香港就係咁,就變左咁。你唔行出黎,就係咁。

呢個就係香港。警察亦都唔係保護小巿民既。依家每一晚都係咁。

如果你睇左昨日啲人點傷,聽晚可唔可以唔好嫌遠走出黎啊。

我知旺角8/2真係為篤魚蛋,但其實良景巿民都不過係想保番住良景宵,然後唔想晚晚有班收錢爛仔係度搞黎搞去姐。

屯門真係唔遠,大家唔理唔理,警黑合作就係咁簡單!

========
事緣:屯門良景個邊據現場警察講其實都搞左年半。一開始良景小販係係領展街巿後面開檔,由於領展仆街,唔俾佢地開,咁佢地就逼左出輕鐵站旁外街。本身外街個位就係歸房委會管既,但房委會唔想搞,就推番個波俾領展,咁領展就外判左俾一間爛仔管理公司,最終就晚晚黑民警齊哂。

警察所講就係,班「城管」係個條街位的確係有權扣起小販既野,因為領展同班「城管」簽左三個月約,下放左權力俾佢地。而警察到場原因係班「城管」不單扣人野,仲會打人,所以警方必須係現場睇番住班「管理員」管理,而警方自己都驚黑社會,所以只敢MON住巿民,最終係一定出番警黑合作結果(原意唔係咁,但結局係)。

由於「城管」每日都係凌晨5點收工,一收工係唔會拎走小販既車,基本上小販們已經一早登記等拎番車。所以可以話良景最嬲既係班居民望住良景由本身好好地,去到有班爛仔日日收錢生事,連食下野番個屋企都難,跟住落街圍「城管」又俾人打,警察唔拉人,仲配合佢地出黎買野食、運物資咁,日日LOOP。

現況:暫時良景大叔師奶們都仲係好熱血,晚晚走出黎都唔怕衝,唔介意一期一會。反倒係人數唔夠同埋警黑愈黎愈合作,甚至傾掂哂數「城管」幾點去買野食,幾點運物資入黎。連放「城管」出黎既時間都係夾好哂,巿民一走,警察就收隊,然後「城管」就自行走。

發表意見