立場新聞 Stand News

平等與魚蛋

2015/2/13 — 20:16

【9olitics 按:黃子華嘅「魚蛋論」源自深度哲學理論,真係台上一分鐘,台下十年功……男神吖!嗚呀!33333】

「自由、平等、博愛」一直被視為人類嘅理想,我地會覺得「平等」係好嘅。我地會話「法律面前人人平等」係好嘢,我地覺得選舉應該一人一票、有「平等」嘅參選權同被選權,要「普及而平等」(講起都悲,香港有排都未有呀sosad)。

但點解要平等?諗深一層,呢個問題其實唔易答。

廣告

假設而家有十個人,都患咗絕症,除非食某一隻藥丸,仲要食夠五粒先好,四粒都無效。咁而家就係得四十粒藥丸,點分好?點分都好,「平等」咁分一定係最差嘅:因為每個人都只會得四粒,而四粒係無用嘅,於是佢地就會全部死晒。

又譬如英俊嘅阿南有十隻蘋果,笨實嘅阿東有六隻蘋果。突然阿南靚仔得滯,被自己嚇親,失手跌咗四隻蘋果落地爛咗,咁阿南、阿東都得返六隻。平等啦而家,但好咗喺邊?阿東啲蘋果又冇多到,冇人著數咗喎。

廣告

個古仔好熟口面?「咦做乜大家買串魚蛋咁多錢佢多我兩粒架?我唔要你畀返兩粒我,我要你攞走佢果兩粒…」子華神嘅魚蛋論,咪來自呢個政治哲學上有名嘅Levelling Down Objection 囉。好多哲學家仲拗緊,覺得「平等」其實係無意思架!

 

文:專寫政治哲學的 C.L

9olitics 糾糾政 facebook page

發表意見