立場新聞 Stand News

如何看待六四,係一個如何看待正義嘅問題?

2015/5/28 — 10:57

六四與正義的責任

香港人應唔應該悼念六四、應唔應該支持大陸嘅民主運動?一直以來,如果上面兩個問題答「唔應該」,都會被視為反民主,連建制派都唔敢直接咁答你。但今年情況有變,有啲激進嘅本土主義者提出:八九民運係大陸嘅事!點解關我事呢?香港人冇道德責任去追求「平反六四,建設民主中國」囉,顧掂自己就夠啦。

假設而家有堆人成立咗一個「正義互相社」,裡面好正義咁分配資源、解決衝突。然後佢地寄封信同你講:嗱!因為我地嘅事業係正義嘅,你一定要join!你會話:你都痴線嘅,你正唔正義係你嘅事,憑咩因為咁,我就有道德責任要join?正義值得追求,但人地追求正義,唔會構成我都要追埋一份嘅責任囉。

廣告

但又諗下呢個例子:如果一堆人發起籌款幫第三世界國家滅貧,假設呢個係正義嘅要求,然後佢地寄封信同你講:你有責任join 我地!咁好似又冇咁痴線喎:我哋的確有責任幫下人,而有班人又搞緊,我地又應該「幫得就幫」丫。

廣告

呢度其實係兩種好唔同嘅對正義嘅理解。正義只係「一班人圍內互相對待」嘅方式;定係一種我哋「人之為人」嘅道德要求?我地應該視大陸係一個與我無關嘅(唔正義嘅)互助社,定係視支持大陸民主運動嘅組織同行動,係為公義抗爭?如何看待六四,其實係一個如何看待正義嘅問題!

文:專寫政治哲學的C.L.

 

原題為〈「年年都有」?「幫得就幫」?「關我L事」?如何看待六四,係一個如何看待正義嘅問題?〉;9oilitics facebook

發表意見