立場新聞 Stand News

年輕人最大嘅罪係散播希望

2019/9/3 — 11:19

9 月 1 日,市民徒步從機場行出市區。

9 月 1 日,市民徒步從機場行出市區。

呢幾日深深體會,喺當權者眼中,年輕人最大嘅罪係散播希望......

我幻想,如果我係星期六晚幾經辛苦走入太子地鐵站嘅示威者,之後要面對藍絲廢老,再要應付魔警速龍無差別攻擊,跟住封站冇車走,我諗對我嚟講係件極度絕望嘅事。跟住,佢哋決定徒步行路軌離開,仲要抬住受傷嘅手足,喺暗黑、從未行過,唔知要行幾遠、仲唔知期間會唔會有魔警撲出欄截,亦都係極度恐怖、令腎上線素飆升、心跳極速、同叫人絕望嘅事。但係,佢哋又真係可以行咗五個地鐵站嘅路軌到美孚,然後爆閘兼換衫離開......

到星期日,我一直覺得機場係相當兇險嘅地方,一但被魔警圍捕,交通封鎖,示威者係完全走唔到,會身處一個極絕望嘅境地。結果,魔警真係圍捕、窮追,而示威者竟然係決定徒步行出機場,甚至由東涌行26km到青嶼收費廣場,再上巴士或「校巴」離開,上演一幕驚心動魄嘅「91港版鄧寇克大行動」!

廣告

上述兩件事都令人覺得示威者真係能人所不能,係癡撚線,簡直係 superhero,而 superhero 正正係給予人希望!

而吊詭嘅係,佢哋做嘅所有嘢未必係「有意圖」散播希望,而只係做信念上同當刻實際環境認為係正確或冇辦法唔咁做嘅事。而從今日在場目測一班剛從機場行返嚟東涌(已行咗個幾鐘)但又未決定之後點走嘅年輕示威者,我發現佢哋嘅精神面貌毫無丁點疲累、洩氣或絕望,反而仲好似好冇嘢咁(又唔算好高昂,但就係好似冇乜嘢),期間我仲聽到一啲正打算擸架生去逸東對付白衣刀手(當時仲流傳緊話有此事),教我嘖嘖稱奇!儘管今日「長征」咁大鑊咁消耗,依加喺連登又plan緊聽朝0700不合作運動,你哋乜人嚟㗎?!

廣告

而當權者最想我哋就係處於絕望嘅狀態,以絕望治港/國,三個月都完全拒絕「答應」五大訴求,更出越嚟越大同恐怖嘅暴力打到你怕,拉到你怕,望你收皮,因為絕望之下,人就會放棄,會「累了,停下來」,然後佢哋就可以為所欲為,予取予攜,然後俾返丁屎甜頭你(如派錢),operant conditioning 地 reinforce 你絕望嘅狀態,過行屍走肉嘅餘生。但係當你仲有啲希望,你仲會做啲嘢(乜嘢都好啦),行出嚟,少則激發今晚大量「家長」到青嶼收費區「接放學」,大則一而再再而三會有過百萬人嘅和理非遊行!

無意中散播咗希望,就係呢啲年輕人喺當權者眼中最大嘅罪,令佢哋對你哋恨之入骨,唔大大力打柒你哋唔得!我好想大大聲講,「你哋冇做錯到!」我愛你們!我都好想有一日在場旁觀你哋個「煲底揭口罩相擁」嘅 party,分享你哋嘅喜悅,而我相信若呢一日嚟到,今天被控被判刑嘅手足會獲得特赦,受傷受害被抹黑嘅會得都平反,離開咗嘅會得到立碑紀念,而今日嘅當權者會被清算(而呢一樣亦係當權者最害怕嘅事,所以點解今日乜都企得咁硬)。

(文本無題,題為編輯所擬)

發表意見