立場新聞 Stand News

「幸福醫藥」自殺式插水

2015/7/30 — 18:39

樂視今天貼出的抽水 post 截圖

樂視今天貼出的抽水 post 截圖

「幸福醫藥」行錯一步,一日之間,由抽水Brand,變成笠水Brand,陪同盧教授一齊插水,完美演繹什麼是自殺式PK,由「幸福係要走多一步」,變成「幸福係會PK瞓係度」。

 

品牌出得嚟行,喺FB作戰多年,斷估唔會唔知道,抽水永遠存在風險,特別喺抽政治油水,隨時會滾油上身,火燒後欄。網上有個Post改圖形容得好貼切:「你抽得佢水就唔好怯,一怯,你就輸成世。」既然決定抽,仲要走入最熱嘅廚房抽,就要有豁出去的膽量,千祈唔可以抽一下就龜縮。

廣告

 

 

其實好多人都鐘意你地個獅子山廣告,真係拍得幾好。但香港人提提幸福醫藥:「你抽得佢水就唔好怯,一怯,你就輸成世。」

Posted by 本土工作室 Local Studio HK on Wednesday, 29 July 2015

今次搞出個抽水大頭佛,我覺得好奇怪。「幸福」抽政治水,絕對唔喺新手,之前劉江華升職鳥一炮而紅,「幸福」即時食住個勢喺FB推出「幸福速效升職素」,粒藥仲要喺劉江華垃圾桶! 劉局長身為人肉滅音機都可以坐正,擺明喺方丈頭號寵兒啦,「幸福」唔驚方丈小器,無話抽起個Post,如今小小一個梁粉盧教授倒地,品牌就突然好驚,驚到要縮,點解會咁?

廣告

 

再者,一個品牌既然選擇了在FB走一條夠爆、夠好玩嘅路線,決定要以輕鬆搞笑的手法來取悅網民,又何需突然因為一個插水Post而大動肝火,自我Delete,這樣只會顯得品牌人格分裂,得失更多網民。

 

 

世事就喺咁,好多人又要威,又要帶頭盔,結果,抽水唔成反被抽。國產Letv即時喺FB出了個疑似盧教授睇電視的Post,仲要加多一句 「唔會又要被Delete咁橋啩」。人哋國產品牌都唔驚,我哋本土品牌反而咁驚青,請問我哋嘅獅子山精神去晒邊?

 

 

瞓喺地下咁辛苦,不如舒舒服服坐喺梳化睇Letv啦!(唔會又要被Delete咁橋掛)

Posted by Letv HK樂視 on Wednesday, 29 July 2015

同時刊於作者博客

發表意見