立場新聞 Stand News

幼稚園發通告係侮辱自己嘅腦袋同人格

2019/10/9 — 15:23

圖片來源:作者 Facebook

圖片來源:作者 Facebook

相信好多小孩仍就讀幼稚園的家長,都收到那份教育局有關蒙面法的通告,據知,好多人都很憤怒,拒絕簽署拒絕交回。

我完全唔明白,呢份通告點解要派畀幼稚園。首先係家長都知,幼稚園係傳染病爆發嘅高危場所,香港人係由沙士呢個慘痛教訓開始,先識得戴口罩保護自己,而大部分幼稚園一向喺流感高峰期時都會提醒學童戴口罩甚至派口罩,呢個係行之有效嘅預防傳染病習慣,依家為咗林鄭一個癲婆同一班魔警,立條咁嘅法例已夠賤格,仲要燒到去幼稚園,究竟係咩意思?

最好笑係,有間幼稚園,上星期先有通告話爆發手足口病,叫學童戴口罩,昨天就出張通造話戴口罩小心誤墮法網,唔好戴,咁係咩意思?政治大過幼童嘅健康安危呀?

廣告

另一個離譜之處,係叫人病咗喺屋企休息。好多幼童病完好返,好精神可以上堂,但仲有少少病徵如流鼻水同咳,即係其實仲帶有病毒,戴口罩就係唔想傳畀其他學童,依家你叫佢唔好返學,咁佢唔使學習呀?明明行之有效就係有發燒病完精神就戴返個口罩保障自己保障人哋,咁依家你話唔好,犯法呀,留喺屋企休息。你係咪痴線呀?有啲學校寫明請病假要醫生紙,咁要等病徵冇哂,隨時七至十日,咁我係咪叫醫生寫七至十日假期畀我?邊個醫生會寫畀我?就算寫,我點解要犧牲我孩子嘅學習時間?莫講話有啲家長要白交學費添啦。

再者,我真係想問吓啲幼兒教育工作者,你哋其實係咪真係驚到要放棄常識放棄思考,甘心配合政權去殘害幼兒?一個幼稚園生,點樣去做示威者?如果你發現佢自己蒙住面喺條街,咁已經係疏忽照顧兒童啦,試問有邊個家長會咁做?而根據我粗淺嘅法律常識,幼稚園生咁嘅年紀肯定係被界定為「無能力犯罪」,不用負任何刑責,咁佢哋會因為蒙面被入罪咩?各位幼兒教育工作者又不妨問吓自己嘅良知,你見到自己嘅幼稚園學生因為戴口罩畀警察拉,你係咪唔覺得有問題?係咪覺得好合情合理?

廣告

你收到教育局張咁嘅通告,竟然覺得要發畀幼稚園學生,你即係覺得呢啲學生有機會去做示威者去做激烈抗爭可以告嘅,你唔係侮辱緊呢啲學生,你係侮辱緊自己嘅腦袋同人格。

喺無理規管同幼兒安危兩者當中,任何家長諗都唔使諗都會揀幼兒嘅安危,為人父母者當明此心。呢啲派通告嘅幼稚園校長係咪人哋父母?唔該唔好成日話自己好愛惜學校嘅小朋友,你們不配啊!

 

作者 Facebook

發表意見